Салоҳ, бизга ўтсанг, Роналдудек “соққа” қиласан!
- 3-ноябр 2025, 16:59
- Zohir Toshxo’jayev
- 0
- Футбол
Бу мавсум “Ливерпуль”даги ишлари кўнгилдагидек кетмаётган Муҳаммад Салоҳ Саудия Арабистони клубларининг энг асосий трансфер нишони бўлиб қолмоқда.
Шайхлар 33 ёшли футболчига йилига тахминан 150 миллион фунт стерлинг (170 миллион евро) атрофида маош таклиф қилмоқда. Бу ҳақда TBR Football нашри хабар берди.
Манба маълумотларига кўра, мисрлик юлдузга келгусида клубдан улуш олиш ҳуқуқи ва клуб элчиси сифатида фаолият юритиш имконияти ҳам таклиф этилган.
Таъкидланишича, агар Салоҳ бу таклифни қабул қилса, у ҳолда “Ан-Наср» ҳужумчиси Криштиану Роналду даражасида даромад олади. Роналдунинг йиллик маоши тахминан 175 миллион фунт стерлингни (200 миллион евро) ташкил этади.
Муҳаммад Салоҳ 2017 йилдан бери “Ливерпуль” шарафини ҳимоя қилиб келмоқда. Ўтган мавсум охирида тажрибали футболчи клуб билан амалдаги шартномасини 2027 йилнинг ёзигача узайтирди. Transfermarkt портали маълумотларига кўра, футболчининг бозор қиймати 45 миллион еврони ташкил этади.