Рўзиқул Бердиев: "Термадан келган футболчилар биз кутган ўйинни кўрсата олишмади"
- 21-ноябр 2025, 00:28
- Shuhratbek Jo’rayev
- 0
- Футбол
Суперлиганинг 29-тури доирасидаги "Пахтакор" - "Насаф" (1:0) учрашувидан кейин меҳмонлар бош мураббийи Рўзиқул Бердиев матбуот анжуманида иштирок этди. Бу ҳақида клуб матбуот хизмати маълум қилди.
- Қийин ўйин бўлди. Агарда вазиятлардан фойдалана олганимизда, ўйин бошқача кечиши мумкин эди, - дея гап бошлади, Бердиев.
- Миллий терма жамоадан қайтиб келган футболчилар 24 соат ичида ўйинга тушиши керак бўлди. Миллий жамоадан қайтиб келган футболчиларнинг ҳолати ҳақида гапирсангиз, уларнинг ўйинга таъсири қанчалик бўлди?
- Улар кечаги машғулотга етиб келишмади. "Пахтакор"дан ҳам бир қанча футболчилар термада бўлганди. Футболчиларнинг термада бўлиши бир томондан ёқимли, лекин баъзида зарарга ҳам ишлайди. Уларнинг термадан қайтгани учун ҳолатини ҳисобга олдик ва Шерзод Насруллаевга камроқ имконият бердик. Бошқа футболчиларнинг тайёргарлиги ёмон бўлмагани учун улардан фойдаланишга қарор қилдик. Бу ўйинга таъсир қилиши табиий. Агарда жамоа тўлиқлигича машғулот олиб борса, ҳолат бошқача бўларди. Кўрдингиз, термадан келган футболчилар биз кутган ўйинни кўрсата олишмади.
- "Насаф" Суперлигада 4 ўйиндан бери ғалаба қозона олмаяпти. Бу нима билан боғлиқ?
- Шу босқичгача деярли бир таркиб билан ўйнадик. Барча ўйинлар биз учун оғир ўтмоқда. Керакли футболчилар баъзида ўйинларга тайёр бўла олмаётгани ҳам таъсир қиляпти. Йигитларни бунда айбдор демаган бўлардим, улар бор кучи билан ҳаракат қилишяпти. Бугун "Пахтакор" майдонида қанчалик қийин бўлмасин, борини бериб ўйнашди. Бунинг учун уларга раҳмат айтаман. Натижа яхши эмас, бу борада ўзимизнинг ҳулосаларимиз бор. Биз ҳар бир учрашувда майдонга тушиб, бор кучимизни намойиш қилишга интиляпмиз.
- Суперлига якунланганидан кейин Элит ОЧЛнинг сўнгги ўйини янги йилга деярли бир ҳафта қолганида ўтказилади. Шу давр мобайнида нималар режалаштирилган?
- Аввало олдимизда "Динамо"га қарши ўйин бор, мавсумни муносиб тугатиш керак. Ушбу учрашувдан кейин йигитларга дам берамиз. "Ал Иттиҳод"га қарши ўйиндан олдин йигитларни эртароқ йиғиб, тайёргарликни бошлаймиз.