Рўзиқул Бердиев: "Тадичнинг ўзи қанчалик маҳоратли эканлигини биламиз!"

Элит Чемпионлар лигаси 4-туридан ўрин олган "Насаф" - "Ал Ваҳда" учрашуви олдидан Рўзиқул Бердиев ва Ҳусайн Норчаев иштирокида матбуот анжумани бўлиб ўтди.

"Бу сафарги рақибимиз ҳам анча жиддий. Бизни яна бир оғир ўйин кутиб турибди. Рақибимиз деярли умуман мағлубиятга учрамай келмоқда. Бу дегани жамоа анча яхши шаклланган. Ўйинларини кўрганда эса шунга амин бўлдикки, анча тартибли, яхши ўйин қурувчи жамоа. Рақибни ҳолатидан ва ўз ҳолатиимиздан келиб чиққан ҳолатда айтаман, эртага бизни оғир ўйин кутмоқда.

Нафақат Элит Чемпионлар лигасида, балки ҳар бир ўйинда мухлисларимиз ғалаба кутишади. Буни ҳар доим ҳис қилади. Мусобақани фарқи йўқ, ҳар бир ўйинда ғалаба қозониш учун чиқамиз. Эртанги баҳс ҳал қилувчи аҳамиятга эга бўлиши мумкин. Чунки турнир жадвалидаги ўрнимизни яхшилашимиз керак. 

2017 йилда хам "Ал-Ваҳда" билан тўқнаш келгансиз. Шу вақт оралиғида рақиб қанчалик ўзгарди?

Анча вақт ўтиб кетди-ку. "Ал-Ваҳда" билан 2001 йилда ўйнаганмиз. 2017 йилда "Ал-Васл" билан ўйнаганмиз. 

"Ал-Ваҳда", "Истиқлол" ва "Ал-Қувайт" жамоалари билан ўйнаганмиз. У пайтлар мусобақа - Чемпионлар кубоги деб номланар эди. Ўша турнирда биз гуруҳдан чиқиб, ярим финалгача борганмиз. Афсуски, буни кўпчилик эсламайди. Ярим финал Эронда бўлиб ўтган. "Озодий" стадионида, лойда ўйнаганмиз. Учинчи ўрин учун "Истиқлол" билан ўйнаганмиз ва мағлубиятга учраганмиз. Адашмасам, Кореянинг "Сеул" ёки "Самсунг" жамоаси чемпион бўлган эди. 

"Ал-Ваҳда" тўп билан яхши ҳаракат қилувчи жамоа. Ўйинчилари ҳам шунга мослаб олинган. Биласизлар, Тадичнинг ўзи техник жиҳатдан қанчалик маҳоратли эканлигини биламиз. Тактика ва стратегия танлашда ўзимизни ҳолатимизга қараймиз. Охриги икки кунда машғулот ўтказмадик. Асосан тикланиш жараёнида бўлдик. Шунинг учун, эртага натижа учун керак бўлган тактикадан фойдаланамиз", - деди Рўзиқул Бердиев.

"Авваламбор ассалому алайкум! Эртага бизни жиддий ўйин кутмоқда. Насиб бўлса ғалаба қозониб халқимизни хурсанд қиламиз. 

Бизда босим йўқ. Жиддий тайёргарлик кўряпмиз. Эртага энг яхши ўйинларимиздан бирини кўрсатишга ҳаракат қиламиз", - Ҳусаин Норчаев