"Қўқон-1912" устози: "Ўйиндан аввал бизга қийин бўлишини билгандик"

“Машъал” – “Қўқон-1912” (0:1) учрашувидан кейинги матбуот анжуманида меҳмонлар бош мураббийи Муҳсин Низомиддинов журналистларнинг саволларига жавоб қайтарди.

- Кўрдинглар, ҳақиқий томошабоп ўйин бўлди. Учрашувдан олдин бизга қийин бўлишини билардик. Ўйинни эртароқ бошлаганимиз ва ҳавонинг иссиқлигидан бироз хавотиримиз бор эди. Лекни биз ўйлагандан яхши бўлди. “Машъал”да бош мураббий ўзгарди. Тажрибали мутахассис Асрор Алиқулов “Машъал”га келди. Шунга яраша тайёрлангандик. Худога шукр, ўйлаган мақсадимизга етдик.

- Ҳакамлик ҳақида фикр билдира оласизми?

- Бир марта ҳакамлар ҳақида гапирдим. Бошқа улар хусусида гапирмайман. Ҳакамлар ёш. Уйимизда ҳам, сафардаги учрашувларда ҳам кўряпман, хато қилдими, индамайман. Мен нотўғри нарса кўрмадим. Ҳакамлар ёш келажаги бор, омадини берсин. Ўйинни тўғри бошқаришди, деб ўйлайман.

- Захирадан майдонга туширган футболчингизни яна захирага олдингиз...

- Ўтган сафар уйдаги ўйинда ҳам захирадан тушганди, яна захирага олдим. Нимага? Исоқжоновни жароҳати бор эди. Бугун ҳам ечиниш хонасида шифокоримиз унга укол қилиб майдонга туширяпти. Бу болани тезлиги бор, яхши сифатлари бор. Кўрдинглар, жароҳати тўлиқ ўйнашга имкон бермади. Ўзи ҳам оёғи оғриётганини айтди ва алмаштирдик. Ўрнига Бешимов тушди ва яхши таассурот қолдирди.

- Дарвозабонингизга кўп эътироз билдирдингиз...

- Дарвозабонимиз яхши, ёмон эмас. Бизда иккита бир хил посбон бор. Елкасида жароҳати бор, алмаштиришимиз ҳам мумкин эди. Жароҳати бироз халақит қилиб турди. Аммо охиригача турди, характерини кўрсатди. Хурсандмиз.