Ўзбекистон терма жамоаси Осиё кубогида қандай бренддаги либослардан фойдаланиши маълум

Ўзбекистон миллий футзал терма жамоаси Осиё кубогида 7SABER либосларида иштирок этади

2025 йилнинг 30 сентябрь куни Ўзбекистон футзал федерацияси ва 7SABER спорт бренди ўртасида ҳамкорлик тўғрисида расмий шартнома имзоланган эди. Мазкур келишув мамлакатимиз футзалини ривожлантириш, спорт инфратузилмасини мустаҳкамлаш ҳамда миллий терма жамоаларни замонавий спорт экипировкалари билан таъминлашга қаратилган.

Шартномага кўра 7SABER футзал бўйича Ўзбекистон Олий лига мусобақаларининг расмий ҳомийси сифатида фаолият юриб келмоқда. Шунингдек, жорий йилнинг 27 январидан 7 февралига қадар ўтказиладиган футзал бўйича Осиё чемпионатидан бошлаб Ўзбекистон миллий ҳамда ўсмирлар футзал терма жамоаларини юқори сифатли ва замонавий спорт кийимлари билан таъминлаш мажбуриятини ўз зиммасига олади.

Маълумот ўрнида қайд этиш жоизки, кеча Жакартага жўнаб кетган Ўзбекистон миллий футзал терма жамоаси делегацияси ҳамкор бренд — 7SABER томонидан тўлиқ спорт либослари билан таъминланди. Жумладан, Осиё кубоги–2026 финал босқичи учрашувларида терма жамоамиз 7SABER брендига тегишли оқ ва кўк рангли либосларда майдонга тушади.