"Ўйлашимча, менга нисбатан ҳеч қандай адовати йўқ" - Умарали Раҳмоналиев "Рубин"даги фаолияти, кейинги тақдири ва бошқалар ҳақида нима дейди?

Истеъдодли футболчимиз Умарали Раҳмоналиев жорий мавсумни Россия премьер-лигасида “Рубин” сафида ўтказганидан яхши хабардорсиз. Россия чемпионатида ҳозир қишки танаффус эълон қилинган.

Раҳмоналиев жорий йилда “Рубин” таркибида премьер-лигада 9 маротаба майдонга тушди. Кубок доирасида бўлса, 5 бор қатнашди.

Охирги пайтларда Умаралини ижарага бериши мумкинлиги ҳақида гап-сўзлар ҳам йўқ эмас. Sports.uz журналисти Раҳмоналиев билан суҳбатда бўлиб, унинг фикрлари билан қизиқди.

- Умарали, дастлаб жорий йил ҳақида сўрамоқчиман. Ушбу мавсум сиз учун қандай ўтди? Нимадан кўнглингиз тўлди ва нимадан қониқмадингиз?

- Ассалому алайкум! Бу йилги мавсум мен учун баъзи маънода муваффақиятли ва хайрли ўтди. Аммо ўзим мақсад қилгандек эмас. Лекин Худога шукр, бирор нарса беҳикмат бўлмайди.

- Россия чемпионатида қишки танаффус. Жамоадаги ишларингиз қандай кетмоқда?

- Ҳозир қишки таътилга чиқдик. Жамоадаги ишлар эса жойида.

- Жамоа бош мураббийи Рашид Раҳимов билан муносабатингиз қандай? Уни сизга ишончини ҳис қиляпсизми?

- Рашид Раҳимов билан муносабатларимиз аъло даражада. Ҳозирча камроқ имконият бериляпти. Ўйлашимча, менга нисбатан ҳеч қандай адовати йўқ.

- Эшитишимча, клуб сизни кўпроқ ўйин амалиётига эга бўлиш учун ижарага бермоқчи экан. Вазият шундай тус оляптими? Бунга сиз ҳам розимисиз?

- Буни ҳозир сиздан эшитяпман. Айни пайтда бу хусусида ҳеч нарса дея олмайман.

- Умуман олганда, олдингизда қандай таклифлар бор?

- Ҳозир “Рубин” клуби футболчисиман. Таклифлар ҳақида фақат жамоам орқали билиб олишингиз мумкин.

- Россияга кетиб тўғри қилган эканман деб ўйлаяпсизми? Яъни, рақобатда қийналмаяпсизми?

- Мен ҳар доим машғулотдан машғулотгача ўзимни ўсаётганимни сезяпман. Ҳеч қачон қилган ишимдан афсусланмайман.

- Аббос Файзуллаев Россияга келибоқ ЦСКАда энг яхшилардан бирига айлана оляпти. Бундай сермаҳсулликни кутганмидингиз? Масалан, жамоангиздагилар қандай муносабатда?

- Аббос жуда ёрқин ўйин намойиш этмоқда. Менимча, бу даражада тез ўсишга эришишини ўзи ҳам кутмаган эди. Ҳаёт шунақаки, бизнинг режаларимиз бўйича эмас, Яратганнинг айтгани бўйича ишлар шу даражада тез бўлиб кетади. Жамоамдагилар бундай иқтидорли футболчини фақатгина олқишлашади.

- Биламизки, сиздаги иқтидор ҳам улкан ва келажагингиз порлоқ. Аммо доим ҳам сиз ўйлаган нарсалар амалга ошавермайди. Масалан, у ерда биринчи дуч келган муаммоингиз нима бўлди?

- Тўғри, ҳар доим ҳам барчаси яхши бўлавермайди. Аммо ҳозирча мен ҳеч қандай айтарли қийинчиликларга дуч келганим йўқ.

- Раҳмоналиев қачон Россия футболида ўз сўзини айтади?

- Олдимизга улкан мақсадлар қўйганмиз. Худо хоҳласа, эришмагунча ҳеч нарсадан қайтиш ва меҳнат қилишдан тўхташ йўқ.

- Жамоадошингиз ва ҳамюртингиз Рустам Ашурматовга қандай таъриф берган бўлардингиз?

- Рустам ака жуда самимий инсон. Рустам акадаги сабр менимча кўплаб инсонларда йўқ. У инсон нафақат футболда, балки ҳаётий масалаларда ҳам маслаҳатларини бериб туради.

- Билишимча, сизни "Бунёдкор"да Канте деб чақиришарди. "Рубин"да сизни нима деб аташади?

- “Рубин”да мени Умарали ва Ума деб чақиришади. Баъзида ҳазил тариқасида Канте деб ҳам мурожаат қилишади.

Шуҳратбек Жўраев.