Марадонанинг муштлашувда йиртилган кийими рекорд нархда сотилди

Аргентиналик ҳужумчи Диего Марадонанинг футбол либоси "Matchday Football Auctions" кимошди савдосида 152 минг еврога сотилди, деб хабар беради Mundo Deportivo.

Футболка 123 минг еврога сотилди, аммо 23% комиссия туфайли унинг ҳақиқий нархи 152 минг еврони ташкил этди. У Марадонанинг кимошди савдосида сотилган клуб футболкалари орасида энг қиммати бўлди.

Ушбу футболкада Марадона 1984-йилги Испания кубоги финалида "Барселона" сафида ўйнаган, ўшанда кўк-анорранглилар Билбаонинг "Атлетик" жамоасига 0:1 ҳисобида мағлуб бўлган. Ўйиндан сўнг майдонда муштлашув бошланиб, футболчининг экипировкаси йиртилган.

Лот тавсифида айтилишича, футболкани кийим алмаштириш хонасида кир ювиш учун форма йиғаётган клуб ходими топиб олган, у уни таъмирлай олмаган ва эсдалик учун қолдирган. Йиллар ўтиб, у футболкани таниш эркакка совға қилди, кейин эса кийим унинг ўғлига мерос бўлиб ўтди ва у уни кимошди савдосига қўйди.

Марадона 2020 йилда 60 ёшида вафот этган. Аргентиналик футболчи 1986-йилги жаҳон чемпиони ҳисобланади, у "Барселона" таркибида Испания кубоги ва Суперкубогини қўлга киритган. Италиянинг "Наполи" клуби билан биргаликда у икки карра Италия чемпиони, мамлакат кубоги, Суперкубоги ва УЭФА кубоги соҳибига айланди.