Максим Шацких: "Биз робот эмасмиз, дўстлар..."

Осиё Чемпионлар лигаси 6-туридан ўрин олган "Пахтакор" - "Ал Файҳа" баҳси бўлиб ўтди. Мазкур беллашувда тошкентликлар йирик 1:4 ҳисобида мағлуб бўлди. 

Учрашувдан сўнг "шерлар" бош мураббийи Максим Шацких матбуот анжуманида ўз фикрлари билан ўртоқлашди. 

"Хайрли кеч! Бугун индивидуал хатоларга кўп йўл қўйдик. Бу мағлубиятимизга таъсир ўтказмасдан қолмади. Биз ҳаракат қилдик, аммо доим ҳам ҳаммаси сиз ўйлагандек бўлавермайди. 

Биз минимал вазифани бажардик. Кадрлар бўйича бизда етишмовчилик борлигини ҳамма билиб турибди. Биз бундай даражадаги беллашувга тайёр эмасдик. Ҳар томонлама, яъни ҳам жисмонан, ҳам руҳан тайёр эмасдик, деб ҳисоблайман. 

Мослашиш жараёни учун кўп вақт керак бўлади. Бизда эса ҳаммаси жуда зич эди. Агар бизда маҳаллий кучли футболчилар бўлганида, улардан фойдаланган бўлардик. Легионерлар борасида ҳам шундай дея оламан. 

Машғулотлар ўтказиш жараёнида ҳаммаси яққол кўзга ташланади. Даражани ўша вақтда сезиб олиш қийин эмас. 

Биз робот эмасмиз, дўстлар. Бизда ҳаммаси ўта тартибсиз жойлаштирилган. Ҳаммасига улгуриш имконсиз. Терма жамоалар ўртасида халқаро мусобақалар, Суперлига, кубок ва ОЧЛ каби мусобақалар бизни толиқтириб қўйгани айни ҳақиқат. 

Мен қайд этган натижаларимиздан қониқиш ҳосил қилдим, албатта. Бунга ишончим комил.

Муаммолар ҳамма ерда бор. Биз тезкор футбол намойиш этилаётганини кўриб турибмиз ва шунга монанд ҳаракат қилишимиз кераклигини ҳам тушунамиз. Аммо ҳаммаси биз ўйлагандек кечмаяпти. Бу биз учун энг асосий муаммо.

"Ал-Файҳа" яхши жамоа. Юқори савиядаги футболчиларга эга клуб. Уларга қарши имкониятлардан фойдалана олмадик.

Келаси мавсум ҳақида гапириш жуда қийин. Нима бўилишини вақт кўрсатади", - деди мутахассис.