Легионеримизнинг қарори қатъий: у бошқа чемпионатга кетяпти

Қишки трансфер ойнаси очилган маҳалда футболчиларнинг “бозор”и “қайнайди”. Бундай пайтда мухлисларни ўйинчиларнинг клубини ўзгартираётгани, жамоаларда қандай янгиликлар бўлаётгани қизиқтиради. Шунингдек, кимдир легионерга айланади ёки кимдир легионерликдан кетиб ўзимизни чемпионатга қайтади.

Жорий мавсумни Қирғизистон чемпионатида ўтказган ҳамюртимиз Саидумар Содиқовнинг фаолиятида ўзгариш бўлади. Келаси йили 23 ёшни қаршилайдиган иқтидорли ҳужумкор ярим ҳимоячи бу йил “ОшМУ Алдиер” жамоаси шарафини ҳимоя қилди. Унгача эса Содиқов “Андижон” клубида тўп сурган.

Қирғизистон чемпионатида “ОшМУ Алдиер” 10 та клуб орасида 25 очко билан 7-поғонадан жой олди. Содиқов эса жамоасининг энг яхши футболчиларидан бири бўлди. Саидумар 25 та учрашувда 4 та гол урди ва 7 та голли пасни узатди. Айнан ассист бўйича у Қирғизистон чемпионатида иккинчи ўринда бўлди. Гол+пас бўйича ҳам легионеримизнинг кўрсаткичлари ижобий кўриниш олди. Унга ёзда ҳам қизиқарли таклифлар тушганди. Ўзбекистондан ва Черногориядан Саидумарнинг хизматига қизиқиш билдирган клублар бўлган. Аммо ўшанда қирғиз жамоаси ҳамюртимизни таркибда сақлаб қолишга муваффақ бўлган.

Бу сафар вазият бошқача. Чунки футболчининг шартномаси тугади. Гарчи “ОшМУ Алдиер” уни сақлаб қолишга ҳаракат қилган бўлса-да, Саидумар энди янги чақирувларни қабул қилмоқчи. Қолаверса, Қирғизистоннинг етакчи жамоалари ҳам футболчимизга таклиф билан чиқишди. Аммо у рад этди.

Саидумарнинг агенти Беларусь чемпионатидан қизиқарли таклифни тақдим қилди. Аниқроғи, “Славия Мозир” жамоасидан ҳамюртимиз учун жиддий таклиф келиб тушди. Музокаралар деярли ижобий якун топган. Содиқов январь ойининг бошларида Беларусга жўнаб кетади.

Саидумарда ҳам ўзини Беларусь чемпионатида синаб кўриш иштиёқи кучли ва шу орқали Европанинг янада кучлироқ чемпионатига йўл олишни мақсад қилган. Январь ойида футболчимиз “Славия Мозир” билан шартнома имзолайди.