"Клубни режаси мени қизиқтириб қўйди, таваккал қилмасангиз тарих ёза олмайсиз" - Шерзод Темиров Ироқнинг "Арбил"ига ўтгани ҳақида

Яқинда Ироқ чемпионатига ҳамюртимиз Шерзод Темиров кўчиб ўтди. Бунгача икки йилча Гонконг чемпионатида “Китчи” шарафини ҳимоя қилиб келди. Яқинда эса ҳужумчи Ирқонинг “Арбил” жамоаси билан шартнома имзолади. Sports.uz журналисти эса Темиров билан суҳбатлашди.

- Шерзодбек, нима учун айнан Ироқ клубини танладингиз?

- Ироқ лигасини танлашимга сабаб, олдинлари бу ерда ўзбекистонликлар ўйнашмаган. Бу лигада ҳам юртимизда яхши футболчилар борлигини ажойиб ўйинларимиз билан исботлашимиз керак, деб ўйлайман. Ушбу лигани танлашимдан хурсандман. Клубда келишимда мени ҳар томонлама қўллаб-қувватлашди, бу жуда ҳам ёқимли.

- “Арбил” клубини сизни ўзига тортган жиҳати нимада? Клубни мақсад ва режаси қандай?

- Аввало, клубни мақсади ва режалари мени қизиқтириб қўйди. Бу жамоа чемпион, катта клуб ҳисобанади. Ироқда мақсадли жамоаларни мен ҳам доим ҳурмат қиламан. Бундай клублар билан ишлашга тайёрман.

- Ироқ чемпионатида ўзбек футболчилари ўйнашмаган. Бу сиз учун таваккалчилик эмасми?

- Сиз ҳаётда таваккал қилмасангиз тарих ҳам ёза олмайсиз. Баъзида таваккал қилишдан қўрқмаслик керак.

- Қайси рақамни танладингиз? Клуб сизга қандай шароитларни яратди ва қандай кутиб олди?

- Ҳаммаси жуда ҳам ажойиб тарзда ўтди. Клуб томонидан кутиб олиш яхши ўтди. Рақамларни энди танлаймиз. Лекин майдонда рақамлар ҳеч нимани ҳал қилмайди. Машина, уй, овқатланиш харажатларим клуб томонидан таъминланган.

- Ўзбекистон чемпионатига қайтишни хоҳламадингизми ёки сизга маъқул келадиган вариант чиқмадими?

- Менда вариантлар бор эди. Ҳозир ўйнайдиган ёшдаман. Худо хоҳласа, кўпроқ тажриба тўплаб яна терма жамоамизга фойдаси тегадиган ҳужумчи бўлишни мақсад қилганман.