Ҳусановдан кейин “Манчестер Сити”га яна бир хушхабар келди
- 28-октябр 2025, 07:23
- Zohir Toshxo’jayev
- 0
- Футбол
Ўзбекистон миллий терма жамоаси ҳимоячиси Абдуқодир Ҳусанов клублар миқёсида “Манчестер Сити” шарафини ҳимоя қилаётгани боис, sports.uz портали ушбу клубга оид янгилик, хабар ва маълумотларни ўқувчилар эътиборига ҳавола қилади.
“Манчестер Сити” мураббийлар штаби ва жамоа мухлислари Абдуқодир Ҳусановнинг жароҳатдан қутилиб, сафга қайтгани ҳақидаги хушхабар таъсиридан чиқмай туриб, тиббийт бўлимидан яна бир янгилик келди.
Жамоанинг энг муҳим ўйинчиларидан ҳисобланган Родри ҳам саломатлигини тиклаб яна машғулотларга киришиш учун рухсат олди.
Бу ҳақида таниқли инсайдер Фабрицио Романо ўзининг ижтимоий тармоқдаги саҳифаси орқали хабар қилди.
“Олтин тўп” соҳиби ҳисобланган 29 ёшли испан футболчиси Англия чемпионатининг 7-туридан ўрин олган “Брентфорд”га қарши учрашувда тиззасидан шикастланган эди ва унинг ҳам тикланиш жараёни худди Ҳусановники каби кутилганидан узоқроққа чўзилди.
Родри “Манчестер Сити”га 2019 йили Мадриднинг “Атлетико” клубидан кўчиб ўтган. Маҳоратли таянч ярим ҳимоячиси устози Хосеп Гвардиола қўл остида клублар миқёсидаги деярли барча нуфузли совринларнига эга чиқди.
Холанд “жиннича” голлари сирини очди
Замонамизнинг энг зўр ҳужумчиларидан ҳисобланган Эрлинг Холанд тўпурарлиги ва самарадор ўйини сирини очди. 25 ёшли футболчи голлар ортида машаққатли меҳнат ётганини маълум қилди.
Холанд “Манчестер Сити” ва Норвегия терма жамоаси сафида охирги 14 та учрашувда рақиблар дарвозасини 24 маротаба ишғол қилди. Эрлинг жорий мавсумнинг ўзида тўпурарлик бўйича бир неча рекордларни янгилади.
Норвегиялик ҳужумчи шу даражадага чиқиш фақатгина машғулотларга эмас, бир неча бошқа омилларга ҳам боғлиқ эканини таъкидлади.
- Менда табиатан эгилувчанлик яхши шаклланган. Айниқса, сон қисмида шундай. Голлар уришим учун айнан мана шу хусусиятимни сақлаб қолишим талаб этилади. Йўқса, қандай қилиб тўп киритишим мумкин?
Шунақа “жиннича” голларни уришим учун менга яхши даражада эгилувчанлик ва ҳаракатчанлик керак. Бу ҳақиқатан жуда муҳим.
Одамлар доим учрашувлар, голлар, нишонлашларни томоша қилади, бироқ бунинг ортида соатлаб давом этадиган тайёргарлик жараёнларини ҳис қилмайди. Ана шу машаққатли меҳнат ҳозир қилаётган ишларим пойдевори ҳисобланади. Мухлислар менинг мана шу жиҳатларимни ҳам ёқтиришига умид қиламан, - деди Эрлинг Холанд.
Таъкидлаш лозимки, Эрлинг Холанд ўз турмуш тарзини жиддий тарзда назорат қилади. Доим қатъий диетага амал қилади, овқалишда махсус стейк ва хом сут истеъмол қилишга алоҳида урғу беради. Бақувват ҳужумчи кўпинча ўзи таом тайёрлашни маъқул кўради.
Гвардиол футболни ташлаб кетмоқчи бўлди
“Манчестер Сити”нинг универсал ҳимоячиларидан Йошко Гвардиол илгари футболни ташлаб, баскетбол билан профессионал даражада шуғулланишни режа қилганини айтиб ўтди.
“Манчестер Сити” хорватиялик ҳимоячини олиш учун 2023 йили “Лейпциг” клубига 77 миллион фунт ўтказиб берган. Бу сумма Гвардиолни жаҳон футболидаги энг қиммат иккинчи ҳимоячига айлантирди.
Бироқ Йошко учун бу даражага кўтарилиш осон бўлмаган. 16 ёшида “Динамо Загреб”да ўйнаб юрган Гвардиол бирдан футболдан лаззат олмай қўйди.
- Мен футболни ташламоқчи бўлдим. Чунки менга баскетбол ҳам ёқарди. Футболдаги келажагимдан умидим сўнгган эди, майдондаги машғулотларда ўзимни бахтиёр ҳис қила олмаётгандим.
Мен ўзимни бахтли ҳис қилиш учун бошқа ечим топишга уринардим, атрофимдаги барча дўстларим баскетбол ўйнарди.
Табиийки, профессионал футболчи бўлишни орзу қилганман. Лекин бунақа узоққа бора оламан, деб ўйламаганман. Агар беш йил аввал мендан “2023, 2024, 2025 йилда ўзингни “Манчестер Сити”да кўра оласанми?”, деб сўраганингизда бунинг ҳеч қандай имкони йўқ, даган бўлардим, - деди Йошко Гвардиол ВВС журналистлари билан суҳбатда.