Ҳусанов ўрнига жаҳон чемпиони келади!
- 6-октябр 2025, 00:00
- Zohir Toshxo’jayev
- 0
- Футбол
“Манчестер Сити” 2025 йилнинг 20 январида жамоага Абдуқодир Ҳусановни олиб келиш билан бошлаган авлодлар алмашинуви жараёнини ҳали якунлагани йўқ.
Хосеп Гвардиола иккита трансферлар ойнаси давомида ўз жамоасига ўн нафардан кўп янги ижрочиларни қўшиб олганига қарамай, айрим позицияларни янада кучайтиришга эҳтиёж борлиги кўриниб қолди.
Ҳозир “Манчестер Сити”нинг энг заиф нуқтаси ҳимоянинг ўнг қаноти бўлиб турибди. Бу позицияда ўйнашга асосий номзодлар ҳисобланган Рико Льюис ва Матеуш Нуньеш деярли ҳар бир учрашувда ҳимояланишда хатога йўл қўйиши табиий ҳолга айланган.
Шу боис, Хосеп Гвардиола сўнгги учрашувларда бу позицияда асли марказий ҳимоячи бўлган Абдуқодир Ҳусановни ўйнатишга қарор килди. Ҳусанов бу позицияда идеал ижрочига айланди. 21 ёшли легионеримиз жароҳат олгунга қадар бу нуқтада жуда яхши ўйин кўрсатаётган эди.
Хосеп Гвардиола Абдуқодир Ҳусанов ўзиники қилиб олган жойга барибир ҳақиқий ўнг қанот ҳимоячиси керак, деган хулосага келди.
TEAMtalk нашрининг ёзишича, манчестерлик скаутлар ҳозир Хосеп Гвардиола ўйин услубига мос тушадиган ўнг қанот ҳимоячини топиш мақсадида бир неча номзодларни ўрганиб чиқмоқда. Манбага кўра, “шаҳарликлар”га Испания чемпионатида “Атлетико Мадрид” шарафини ҳимоя қилаётган Науэль Молина маъқул келган.
27 ёшли аргентиналик жаҳон чемпиони “Манчестер Сити” бош мураббийи Хосеп Гвардиола қўйган талабларнинг аксариятига мос келиши айтиляпти.
Науэль Молина аслида Аргентинанинг “Бока Хуниорс” клуби тизимида тарбияланган. Ўз юртида бу клубнинг иккинчи жамоасидан ташқари “Дефенса” ва “Росарио”да ҳам тўп тепган. Молина 2020 йили Европага кўчиб ўтди. Италиянинг “Удинезе” клуби уни эркин агент мақомида ўз сафига қўшиб олди.
2022 йили Молина Мадридга йўл олди. “Атлетико” бош мураббий Диего Симеонега маъқул келган ўйинчи учун А Серия клубига 20 миллион евро тўлади.
Тўлиқ ўнг қанотни ёпа оладиган бу ўйинчининг “Атлетико” билан амалдаги шартномаси 2027 йилнинг ёзида якунланади. Жорий мавсум якунланганидан кейин уни арзонроқ сотиб олиш имкони туғилади.
Икки йил аввал трансфер суммаси 50 миллион еврога кўтарилган аргентиналик бу юлдузни Transfermarkt портали айни пайтда 20 миллион еврога баҳоламоқда.
Таъкидлаш жоизки, Абдуқодир Ҳусанов ҳозир жароҳати туфайли “Манчестер Сити”га ёрдам бера олмаяпти. Ҳамюртимиз мавсум бошидан бери иккинчи марта жароҳатга йўлиқди. Энг ачинарлиси, сентябрь ойида Ўзбекстон миллий терма жамоаси йиғини ва учрашувларда иштирок эта олмаган Абдуқодир октябрь ойидаги халқаро танаффусда ҳам терма жамоага кела олмайди.
Ҳусановнинг устози суперрекорд ўрнатди
Ҳусанов жамоасида яна жиддий ўзгариш бўлади: Холанд ва Родри кетиши кутиляпти