Бош мураббий термадан кетган тўпурар ҳақида баёнот берди

Польша миллий терма жамоаси бош мураббийи Ян Урбан 37 ёшли ҳужумчи Роберт Левандовскининг халқаро миқёсдаги фаолиятини якунлаши ҳақида изоҳ берди.

Швеция — Польша ўйинидан кейин Роберт Левандовски натижа билан узоқ вақт муроса қила олмади. Польша терма жамоаси сардори майдонни энг охирги бўлиб тарк этди ва содир бўлган ҳолат сабаб жуда тушкун ҳолда кўринди.

Ўйиндан кейин “Барселона” ҳужумчисининг ижтимоий тармоқлардаги пости қўшимча саволларни келтириб чиқарди. Бир қарашда бу ерда ғайриоддий ҳеч нарса йўқ эди — Левандовски шунчаки ўйиндан кейинги суратини жойлаштирди. Аммо мусиқий фон эътиборни тортди. Бу Андреа Бочеллининг “Time to say goodbye”, яъни “Хайр дейиш вақти келди” қўшиғи эди. Ушбу постдан кейин Польшада “Леви” шу тарзда терма жамоа билан хайрлашгани ҳақида муҳокамалар бошланди.

- Менимча, Роберт ҳали якуний қарор қабул қилмаган. Мен у билан бу мавзу ҳақида гаплашдим ва шошилиш учун сабаб йўқ. Унинг ўйлаб кўриши учун вақт олишига қаршиман эмасман. Ҳозир унинг бошида жуда кўп масалалар бор, чунки у яна қаерда ўйнашини ҳам ҳал қилиши керак. Бу жуда муҳим қарорлар. Терма жамоа мураббийи сифатида битта нарсани айта оламан: Роберт шундай спорт формасидаки, у албатта бу жамоага ҳали керак бўлади. Қачон тугатиш кераклигини унга айтиш шарт эмас, - деди  Урбан TVP Sport дастурида.

Мураббийдан яна Левандовскини терма жамоада қолишга кўндириш-кўндирмаслиги ҳақида ҳам сўрашди.

- Мен уни кўндирмайман. Роберт билади, терма жамоа эшиклари унинг учун ҳар доим очиқ, қарор эса фақат унга тегишли. Мен уни ишонтиришим мумкин эмас. Бу ажойиб тарих яратган футболчи. Роберт шундай мақомга эришганки, биз унинг қарорини хотиржам кутишимиз мумкин. У бизнинг терма жамоамиз учун жуда қимматли ўйинчи. Яхши ҳужумчиларни топиш осон эмас, - деб қўшимча қилди Урбан.

Польшада ҳужумчилар танқислиги кескин сезилмоқда. Ҳеч бир форвард Европанинг кучли чемпионатларида мунтазам гол ура олмайди. Левандовскининг вориси ҳозирча кўринмаяпти ва яқин вақт ичида пайдо бўлмаслиги ҳам мумкин.

- Миллатлар лигаси ўйинларида Робертсиз ўйнашимизга тўғри келиши мумкинлигини истисно қилмайман. Агар у шундай қарор қилса, биз буни ҳурмат қиламиз. Биз унга катта хайрлашув маросими ташкил қиламиз, чунки Польша терма жамоасининг буюк афсонаси кетади. Робертнинг рақамлари жуда катта ва тарихий, - дея хулоса қилди Польша терма жамоаси бош мураббийи.

Польша миллий терма жамоаси сафида Роберт Левандовски 165 та ўйин ўтказиб, 89 та гол урган, кўп йиллар давомида жамоанинг етакчиси, сардори ва энг яхши тўпурари бўлиб келган.