"Андижон"нинг Тожикистондаги йиғини қандай ўтмоқда? Дамир Темиров нималарни айтди?

ФИФА кунларидан фойдаланиш мақсадида “Андижон” клуби қўшни Тожикистонда ўқув-машғулот йиғинларини олиб бормоқда. Бундан мақсад биринчи давранинг сўнги турларига оптимал формада етиб бориш.

Шу мақсадда футболчилар Тожикистондаги йиғинда астойдил меҳнат қилишмоқда. Жамоа етакчиларидан бири Дамир Темиров айнан мазкур тайёргарлик жараёнига оид саволларга жавоб берди.

- Жамоанинг Тожикистондаги йиғини қандай ўтмоқда, таассуротла қандай?

- Таассуролар яхши, шароитлар аъло даражада. Шунча шароит, имкониятлар мавжуд. Атмосфера ажойиб, майдон, тренажёр зали бор.

- Демак, ҳар томонлама қониқиш ҳосил қиляпсиз?

- Ҳаммаси яхши. Икки маҳалдан шуғулланяпмиз. Барчаси зўр.

- “Андижон” ФИФА кунларидан фойдаланиб мазкур йиғинни ташкил қилди ва бу жамоа учун жуда муҳим. Чунки олдинда биринчи давринг сўнгги 4 та ўйини турибди. Нима деб ўйлайсиз, ушбу йиғин расмий учрашувларда қанчалик фойда келтиради?

- Машғулотларда асосий эътибор жисмоний тайёргарликка қаратилган. Менимча, ўз мевасини беради, деб ўйлайман.

- “Андижон” бу ерда кунига икки маҳалдан шуғулланмоқда. Фитнес залида ҳам алоҳида ишланяпти ва майдонда ҳам. Қандай ўтмоқда?

- Айтиб ўтганимдек, жисмоний тайёргарликка урғу берилган. Аммо шу билан бирга майдонда тўп билан ҳам ишлаяпмиз. Қолаверса, тактика устида ҳам кўпроқ иш олиб бормоқдамиз. Позицион тўғри ўйнаш ва тўғри ўйлаш учун ишлаяпмиз.

- Жамоада кайфият қандай?

- Кайфият аъло даражада. Ҳар доимгидек барча қувноқ. Ҳамма позитив.

- Ўз ҳолатингиз қандай? Жароҳатлар безовта қилмаяптими?

- Худога шукр, соғлиқ яхши, иштиёқ бор.

- Жамоадан ижобий натижа кутаётган ишқибозларга қандай гапларингиз бор?

- Фурсатдан фойдаланиб, мухлисларимизга раҳмат айтмоқчиман. Қийин пайтимизда ҳам бизни қўллаб-қувватлашди, буни ҳис қилиб турдик. Худо хоҳласа, улар кутаётган натижаларни беришга ҳаракат қиламиз.