Алонсо "Реал"га ўзи билан бирга "Байер"нинг икки футболчисини олиб келмоқчи
- 30-апрел 2025, 16:05
- Jahongir Inomjonov
- 0
- Футбол
Хаби Алонсо "Реал"га "Байер"нинг икки ўйинчиси, "Реал Сосьедад"нинг эса бир нафар футболчисини жалб этмоқчи.
"As" нашрининг хабар беришича, мураббий трансферлар бўйича "қаймоқранглилар"га қандай таклифлар беришни аллақачон билади. У икки ярим ҳимоячи - "Реал Сосьедад"дан Мартин Субименди ва "Байер"дан Флориан Вирцни сотиб олишни сўрайди.
Клуб ҳар иккала ўйинчини узоқ вақтдан бери кузатиб келмоқда ва Субименди учун "Арсенал" билан, Вирц учун эса "Бавария" билан рақобатлашишга тўғри келишини билади. Мартин учун 60 миллион евро тўлаш керак бўлса, Вирц учун "Байер" камида 100 миллион евро талаб қилади.
Алонсо рўйхатидаги учинчи ном - "Байер"ни эркин агент сифатида тарк этаётган Жонатан Таҳ. Германия терма жамоасининг марказий ҳимоячиси "Барселона" билан дастлабки келишувга эришган, бироқ клуб футболчи билан шартномани ўз вақтида расмийлаштира олмаслиги эҳтимоли мавжуд.
Маълумот учун, "Байер"ни бошқараётган Хаби Алонсо ёзда "Реал"нинг бош мураббийи Карло Анчелоттининг ўрнини эгаллаши кутилмоқда.