Ro‘ziqul Berdiev: "Chempionlik haqida gapirishga hali erta, Lima bugun juda ham muhim golni kiritdi"

O‘zbekiston Superligasi 22-turidan o‘rin olgan "Qizilqum" - "Nasaf" uchrashuvi nihoyasiga etdi. Unda mehmonlar 2:1 hisobida g‘alaba qozondi.

Bellashuvdan so‘ng har ikkala jamoa bosh murabbiylari ishtirokida matbuot anjumani bo‘lib o‘tdi. Quyida "ajdarlar" ustozi Ro‘ziqul Berdievning fikrlari bilan tanishib chiqing: 

"Tabrik uchun rahmat! Bugungi raqibimiz juda ham tajribali va kuchli edi. Qolaversa, biz ularning maydonida harakat qildik. Biz uchun o‘ta muhim bahs edi.

G‘alaba zarurligini futbolchilar yaxshi tushungan holda, maydonga tushishdi. Albatta, asabiy uchrashuv bo‘ldi. Biroq asosiysi, natija uchun borimizni berdik.

O‘yinga keladigan bo‘lsak, raqibimiz ko‘proq himoyalandi. Legioner futbolchisi bilan qarshi hujumga o‘tishga harakat qildi. Lekin himoyachilarimiz uni to‘xtata olishdi.

Faqat bir vaziyatda u yakkama-yakka holatga chiqib ketdi va darvozabonimiz xavfni bartaraf etdi. O‘sha holat golga aylanganda, bahs yanada qiyin bo‘lardi biz uchun. 

Ikkinchi bo‘limda to‘liq hujumga e’tibor qaratdik. Sababi, bizga g‘alaba muhim edi. O‘ylashimcha, kuchli raqib maydonida o‘ta kerakli 3 ochkoni qo‘lga kiritdik. 

- Bugun Lima Kruz chempionlik golini urdi, deya olasizmi? 

- Chempionlik haqida gapirishga hali erta. Hali qiyin bellashuvlarimiz bor. Aytish kerakki, Lima bugun juda ham muhim golni kiritdi. U oxirgi o‘yinlarda jamoaga katta yordam bermoqda. Futbolchimiz raqiblarga bosim o‘tkazmoqda, hujumda faol harakat qilyapti. U bugun katta ishni bajarib berdi.

- Oxirgi o‘yinlarda Eshmurodovni "libero" (erkin himoyachi) sifatida o‘ynatib kelayotgan edingiz. Nima uchun bu safar G‘aybullaevni sinab ko‘rdingiz? 

- E’tibor bersangiz, oldingi uchrashuvlarimizda Davronov, G‘aybullaev va Aliqulov uchlik sifatida harakat qilayotgandi. Umar oldinroqda to‘p tepayotgandi. Alibek (Davronov) ning yo‘qligi sabab Eshmurodovni orqaga qaytarib, Aliqulov, Eshmurodov va G‘aybullaev bilan uch himoyachi bo‘lib harakat qildik. 

Oxirgi vaziyatlarda o‘yin shuni taqozo etdi. Ya’ni, Eshmurodov oldinroqqa o‘tishga majbur bo‘ldi. Unda hujumni boshlab berish qobiliyati bor. Ba’zida undan hujumlarga qo‘shilishni talab qilamiz", - dedi qarshiliklar bosh murabbiyi.