Odil Ahmedov adolat bo‘lmasa, futboldan ketishi va faoliyatini qaysi klubda tugatishi haqida fikr bildirdi (Intervyu)
O‘zbekiston milliy terma jamoasi sardori Odil Ahmedov SPORTS.uz sayti uchun eksklyuziv intervyu berdi. Suhbat davomida Ahmedov futboldan so‘ng, o‘zini qaysi sohada ko‘rayotgani haqida fikr bildirdi.
- Futbolchilik faoliyatingiz so‘nggida, «Paxtakor» va «Navbahor»dan taklif kelib tushsa, qay birini tanlaysiz?
- Men «Paxtakor» sharafini himoya qilganman. Jamoa muxlislari mehrini qozonganman. Maosh berilmasa ham maydonga tushganman. Emblema hurmati uchun ham maydonda «jang» qilganman. Dadam rahmatlining eng katta orzusi futbolchilik faoliyatimni Namanganda yakunlashimni istar edilar. Bu ularning azaliy orzusi. Ota-onamning hurmati uchun ham butsalarimni Namanganda mixga ilaman.
- Har qanday boshlangan narsaning yakuni bor. Bir kun kelib futbol ham tugaydi. Odil Ahmedov o‘zini qaysi sohada ko‘rmoqda?
- Men futboldan keyin bor e’tiborimni bolalar futboliga va akademiyaga bag‘ishlamoqchiman. Futbolda halollik bo‘lsa, har taraflama ishlash uchun imkoniyat yaratilsa, adolat bo‘lsagina, akademiyani rivojlantirish bilan band bo‘laman. Aks holda, futboldan umuman ketaman. Sababi, ba’zi joylarda adolat bo‘lmasa, qilingan mehnatning samarasi ko‘rinmaydi. Kelajakda qanday faoliyat olib borishim va nimalar bilan band bo‘lishim aynan shu omillarga bog‘liq. Bular bo‘lmasa, futbolga yaqin ham kelmayman. O‘zimni boshqa bizneslarim ham bor. Shularning o‘zi menga etarli. Futbolga nega e’tibor beraman, bilasizmi? Sababi, aynan shu sport turi sababli men ko‘p yutuqlarga erishdim. Futbol menga hamma narsa berdi. Shu bois, futbolimizga qandaydir foydam tegishini juda xohlagan bo‘lar edim.
Fikrlar