"Ҳаммасига мураббий сифатида ўзим айбдорман, шунча ўйиндан бери 1 очко борлиги ўзимга ҳам ноқулай" - Анвар Бердиевнинг курсиси қимирлаб қолди...ми?

Суперлиганинг 8-турида “Шўртан” Ғузорда “Динамо”ни қабул қилди ва 1:3 ҳисобида имкониятни бой берди. Жамоа ҳамон чемпионатда ғалабасиз сериясини давом эттириб, охирги ўринда боряпти. Учрашувдан сўнг “Шўртан” бош мураббийи Анвар Бердиев айрим саволларга жавоб берди.

- Ўйин ҳақида нима дейиш мумкин? Жамоамиз биринчи бўлимда яхши ҳаракат қилди. Иккинчи бўлимда футболчиларимни танимай қолдим. Оддий вазиятларда голлар ўтказиб юбордик. “Динамо” жамоасини ғалаба билан табриклайман.

- “Динамо”га қарши очиқ футбол бўлди. Очиқ тактикани танлаш жамоа ўрнидан келиб чиқиб айтилса, хато бўлмадими?

- Тўғрисини айтаман, жамоамни ҳимоявий футбол кўрсатиш тарафдори эмасман. Энг яхши ҳимоя – бу ҳужум дейилади. Футболчиларимиз биринчи бўлимда ҳам яхши ҳаракат қилишди. Вазиятлар ярата олишди. Агар уларни голга айлантира олганимизда озроқ енгиллик бўлиши мумкин эди. Чунки хоҳлаймизми-йўқми, имкониятлардан фойдалана олмасангиз ҳимояда босим кучайиб кетаверади. Футболчиларим босимни кўтара олишмадими?! Ҳимоявий тактика билан ўйнаш тарафдори эмасман.

- Тўп билан муомала қилиш, имкониятлардан фойдаланиш борасида қандай фикрдасиз?

- Жамоамиз ўйинини кўряпсизлар, имкон қадар қисқа паслар билан ўйнашяпти. Хатолар бўлади. Йигитларни ўзларига ишонч етишмаётгандек бўляпти. Машғулотларда ҳам бунинг устида ишлаяпмиз. Ўхшаётгандек бўляптию, бироқ ўйинда хатолар кузатиляпти. “Динамо” ҳам ҳозирги кунда Ўзбекистондаги энг яхши жамоалардан бири ҳисобланади. Кўп хато қилганимиз кўриниб қолди, деб ўйлайман.

- “Шўртан” ҳужум қилаётганида 64-дақиқада эътирозингизни билдирдингиз. Бу хусусида нима дея оласиз?

- Ўйинни охиригача қўйиб бериб, ВАР борку, кейин кўрса бўларди. Мен шунга эътироз билдирдим. Бизга ажойиб вазият ҳосил бўлганди. Гол уришимиз ҳам мумкин эди. Вазият охиригача етиб, гол урганимизда, сўнгра ВАР кўриб бекор қилса ҳам бўларди. Мен айнан шу ҳолатга эътироз билдирдим.

- Ўтказиб юборилган учала гол ҳам ўнг қанотдан уюштирилган ҳужумлар оқибатида юз берди. Бу чиндан ҳам ушбу позицияда муаммолар борлигидан даракми ёки “Динамо”нинг кучлилигиданми?

- Иккинчи гол урилганида захирадан майдонга тушган футболчимиз кўрсатмани нотўғри тушунди шекилли, ўйиндан кейин савол берсам тушунмаган экан. Учинчи гол ўйин охирида урилди. Ҳимоячида чарчоқ аломати бўлдими, дарвозабон билан иккаласи бир-бирини тушунишмади. Футболчиларимни айбламайман, ҳаммасига мураббий сифатида ўзим айбдорман.

- Ҳар бир мураббийни ўйин охирида калити бўлади. 80-дақиқадан кейин кимнидир майдонга тушириб ўйинни кучайтирадиган, қутқарадиган режаси бўлади. Сизда бундай калит борми?

- Калит эмас, футболчим бўлиши керак. Тўғрисини айтаман, ҳамма ўйинчиларни ҳурмат қиламан. Бизда 70 ёки 80-дақиқадан кейин...Ҳакам хуштак чалдими, шундан футбол бошланади ва охирги хуштаги чалгунгача давом этади. Футболчига фарқи йўқ, қайси пайтда бўлса ҳам ўйнаш керак. Охирги дақиқаларда кимдир тушиб кучайтиради, деган тарафдори эмасман ва бундай деб ҳам ўйламайман.

- Яхши ўйин бўлди, “Шўртан” ҳам икки баробар куч билан ўйнади, очиқ ўйин бўлди. Қолган жамоаларга қарши ўйин қандай бўлади? Очиқ футбол кўрамизми, иштиёқ сақланиб қолинадими? Ёки тушкун кайфият борми?

- Тўғри, ғалаба қозона олмаяпмиз. Лекин тушкун кайфиятга тушишларига йўл қўймайман. Раҳбарият менга қанча ишонади, мен билмайман. Қанча вақт ишласам ҳам мен ёпиқ, ҳимоявий футбол ўйнаш тарафдори эмасман. Ҳар қандай рақибга қарши ҳужумкор футбол ўйнаш тарафдориман. Балки ўйинчиларга ғалабага бўлган ишончни тўлиқ етказиб бера олмаяпмизми?! Улар ҳам бошқалардан кам футболчи эмас. Ўзига ишонч бўлиши керак. Ўйин даражаси бўйича фақат “Насаф”га 4:1 ҳисобида енгилдик. Қолган рақибларга қарши тенгма-тенг ўйин олиб боряпмиз. Яратилган имкониятдан фойдалана олмаслик бўйича оқсаяпмиз. Шу нарса бизга катта таъсир қиляпти.

- Ўйинни белгиланган вақтидан маза қилдингизми? Шу пайтгача Ғузорда ўйин 20:15 да бошланмаган.

- Тўғри. Кечки маҳалда бўлгани ажойиб бўлди. Мухлисларимизга ҳам алоҳида миннатдорлик билдираман, стадионга келиб бизни қўллаб-қувватлашди. Тўғриси, жамоам номидан узр сўрайман. Шунча ўйиндан кейин бир очко борлиги, ўзимга ҳам жуда ноқулай. Раҳбарият менга қанча ишонишда давом этади, буни Худо билади.