Fozil Musaev: "Turon" albatta Superligaga qaytadi"

Tajribali yarim himoyachilaridan biri Fozil Musaevni yaqinda “Metallurg” klubi bilan shartnoma imzolagani haqida saytimiz orqali xabar bergandik.

Bilasiz, Musaev o‘tgan mavsumni “Turon” jamoasida o‘tkazdi. U erda Superliga bahslarida 20 ta uchrashuvda maydonga tushib 2 marta gol urdi. Kubok doirasida esa 3 ta o‘yinda “Turon” sharafini himoya qildi. Klub bilan tuzgan shartnomasi tugagani uchun erkin agentga aylandi va “Metallurg”dan tushgan taklifni qabul qildi.

Fozil “Turon” bilan do‘stona tarzda xayrlashdi. U o‘zining instagramdagi sahifasida quyidagilarni yozdi:

“Turon” rahbariyati, o‘yinchilari va muxlislariga klubda to‘p surgan davrimdagi vaqt mazmunli o‘tgani uchun barchalariga minnatdorlik bildirib qolaman. To‘g‘ri, jamoada o‘zimiz xohlagan natijalarni qayd eta olmadik. Biroq mana shunday o‘yinchilar bilan elkama-elka to‘p surish juda maroqli bo‘lganligini alohida ta’kidlab o‘tishim joiz. Shuningdek, klubning jonkuyar ishqibozlari bizni har qanday holatda ham ajoyib tarzda qo‘llab-quvvatlaganlari sira yodimdan chiqmaydi. Shuni ishonch bilan aytishim kerakki, “Turon” klubi kelgusi yili albatta Superligaga qaytadi. Bu yo‘lda jamoaga omad yor bo‘lishini tilab qolaman. Hammaga yana bir bor katta rahmat!”