"Ёпиқ ўйин қилдик, ҳали имкониятимиз бор, бир жамоага қараб қолганимиз йўқ" - "Шўртан" устози "Пахтакор"дан очко тортиб олгач яна нималарни айтди?

Суперлиганинг 22-турида “Шўртан” “Пахтакор”ни қабул қилди. Фаворит “Пахтакор” ҳисобланган ушбу учрашувда 0:0 ҳисоби қайд этилди. Беллашувдан сўнг Шўртан” бош мураббийи Элдор Мойлиев матбуот анжуманида қатнашди.

- “Пахтакор”ни яхши жамоалигини ва яхши ижрочилари борлигини билардик. Шунинг учун ёпиқ футбол намойиш қилдик ҳамда қарши ҳужумда омадимизни синаб кўрмоқчи бўлдик. Тартибли ҳимояландик. Ҳужумда бироз омадимиз етишмади.  

- “Пахтакор” билан дуранг ўйнаган жамоа ўтган турда “Машъал”га имкониятни бой берганди. Иккала ўйинни солиштиринг. Ўтган сафар қаерларда хато қилингандию ва бу сафар нимани эвазига ғалабага тенг дуранг қайд этилди?

- Ёпиқ ўйнаш осонроқ. “Машъал” билан очиқроқ футбол ўйнагандик. Афсуски, ўша учрашувда ўз хатоларимиз эвазига голлар ўтказиб юборгандик. Бу сафар ўша камчиликларни бартараф қилишга ҳаракат қилдик. Очиқ футбол ўйнаганимизда қарши ҳужумларда ўтказиб юбордик. Бунақа ўйинларда эса ёпиқ футбол ўйнаш осонроқ.

- Жамоага қарши ҳужумларда тезкорлик етишмади, деб ҳисоблайсизми ёки маҳорат?!

- Озгина жойларда тезкорлик етишмади. Олдинги чизиқдаги ўйинчиларимиз - Пўлатхожа, Дониёр ва Тимурдан олдинга ҳаракат қилишларини сўрагандик. Айрим вазиятларда улар сал пастроқ тушишди. Шуни эвазига қарши ҳужумга чиқиб кета олмадик.

- Тимур Мамасиддиқовни алмаштирилиши қарши ҳужумга чиқиб кета олмагани сабаб бўлдими?

- У яхши ҳаракат қилди. Ўйинига эътирозимиз йўқ. Аброрни қўшганимизни сабаби у ҳам тезкор футболчи. Олдинги чизиқни янгилашимиз керак эди. Ҳимоячилар анча тер тўкишди. Ҳужумчиларимиз ҳимояга ҳам қайтиб ўйнашди. Шу боис жисмоний ҳолатда толиқиш бўлганлиги сабабли алмаштирдик.

- Жўжани кузда санайдиган вақт яқинлашяпти. “Шўртан”нинг якуний ҳолатини қандай тасаввур қиляпсиз?

- Ҳаммаси Аллоҳдан. Ҳеч ким эртага нима бўлишини билмайди. Йигитлар билан гаплашиб олдик, охиригача курашамиз. Ҳали имкониятимиз бор, ўз қўлимизда. Бир жамоага қараб қолганимиз йўқ. Ўз ўйинларимизда очколарни ололсак Суперлигада қолишни уддаласак бўлади.

- Футболчиларга келажак керак ва улар ўзини кўрсатиш учун жамоавийдан кўра, индивидуал ҳаракат қилишлари мумкин. “Шўртан”да шунақа ҳолат бўлмаяптими?

- Йўқ, улар қанчалик хоҳлаётганини бугунги ўйинда кўрдинглар. Очко учун футболчилар жонини бериб ўйнашди. Уларни асосий мақсади “Шўртан”ни Суперлигада олиб қолиш. Биз шу мақсад билан бирлашганмиз, шунга ҳаракат қиляпмиз.

- “Шўртан” фаворитларга қарши ўйинларда сифатли ўйин намойиш қиляпти. Лекин фаворит бўлмаган клубларга қарши учрашувларда бундай эмас. Мураббий сифатида бунга нима дея оласиз?

- Юқорида ҳам жавоб бердик, асосан пастдаги жамоалар билан 6 очколик ўйин бўлади ва бунда руҳиятга ҳам кўп нарса боғлиқ. Юқоридаги клубларга қарши йигитлар эркинроқ ўйнашади. Шуни эвазига дурангга эришяпмиз. Ўзимиздаги “Машъал”, “Қўқон-1912”, “Хоразм”га қарши учрашувларда ютиш учун ўйнаяпмиз. Лекин...

- Натижалар негатив...

- “Шўртан”ни биринчи йил чиқиши. Хатоликлар кўп бўлди. Буни оммага айтиш шарт эмас, деб ўйлайман, футболчилар танлашда ёки айрим вазиятларда. Афсуски, про лига билан Суперлига даражасидаги ўйинчиларни фикрлашида фарқ бўлади. Жисмоний ҳолатида ҳам. Шуни эвазига ўзимизга керакли футболчиларни танлай олмадик. Суперлигада даражасини бироз пастроқ баҳоладикми?! Бизда ички муҳитда ҳаммаси аъло даражада. Ишончни йўқотмаганмиз, охиригача курашамиз. Азиз ҳам буни айтиши мумкин.

Азиз Пирмуҳаммедов: - Раҳбарият ҳам келиб қўллаб-қувватлади. Охиригача курашамиз деб ваъда бердик. Уларга ҳам раҳмат. Ҳамма шароитларни вақтида қилиб беришяпти. Худо хоҳласа, раҳбарият олдида юзимизни ёруғ қиламиз. Ички муҳит бизда аъло даражада.

- “Шўртан” бундан кейин ҳам ҳимоявий футболни танлайдими?

- Ҳар бир жамоани ўрганиб чиқамиз. Кейинги ўйин “Динамо” билан бўлса, уларни ҳам кучли тарафларини кўрамиз. Ҳар бир клубга қарши ҳар хил тактикада ўйнаймиз.