Воҳид Шодиев: "Динамо" футболчилари учун Суперлига ўзига хос реклама"

Кўпчилик Самарқанднинг «Динамо» клубини ҳали Суперлигада иштирок этишга тайёр эмаслигини айтган ҳолда уларни аутсайдер сифатида кўришаётганди. Бироқ дастлабки олтита турдан кейин бу жамоа аутсайдер бўлиб қолиш нияти йўқлигини исботлаяпти. Боиси уларнинг ҳисобида ғалаба, дуранг ва мағлубият иккитадан қайд этилган. Ўз уйида «Навбаҳор»га қарши кечган учрашувда 2:2 ҳисоби қайд этилди ва ўйин барчага ёқди. Жамоа таркибида эса ёш ўйинчилар ҳам бор. Шунингдек, тажрибали футболчилардан ҳужумчи Воҳид Шодиевни алоҳида айтишимиз мумкин. Охирги пайтларда қуйи лигада ўйнаган футболчи илк бор Суперлигада қатнашиш имкониятига эга бўлмоқда. «Динамо» эса ушбу ўйинчи орқали бироз кучайишга эришди десак муболаға қилмаймиз.

- Чемпионат яқиндагина бошланди. Ҳаммаси мавсум тугаганидан кейин маълум бўлади, - деб гап бошлади, Шодиев. - Лекин жамоамиздаги ҳар бир ўйинчи ҳаракат қиляпти. Биз учун ҳар бир учрашув худди охирги ўйиндек кечмоқда. Шу боис ўйинларга жиддий ёндашяпмиз. Тўғри, таркибимизда ёш футболчилар кўп ва уларнинг аксарияти янада яхшироқ клубларда ўйнашни хоҳлашади. Улар «Динамо» орқали кучли жамоаларда тўп суриш ниятидалар. Агар мавсум охиригача бўшашмасдан яхшироқ ўйнай олсак, юқорироқ ўринлардан бирини эгалласак бўлади.

- «Навбаҳор»га  қарши учрашув ҳақидаги фикрларингиз қандай?

- Ўйин мухлисларга ёқадиган бўлди. Исталган жамоа ютиши мумкин эди. Бизда ҳам, уларда ҳам голли имкониятлар кўп бўлди. Шунинг учун дуранг иккала жамоа учун ҳам адолатли бўлди. Агарда бундай учрашувда кимдир ютқазса, қаттиқ таъсир қилиши аниқ эди. Аслида эса «Динамо» ҳам, «Навбаҳор» ҳам ғалабани хоҳлаганди.

- Қайд этилган дуранг «Динамо»ни қониқтирди десак бўладими?

- Бу саволнинг ўзи ноўрин. «Динамо» бир очко ололмаслиги ҳам ёки уч очкони қўлга киритиши ҳам мумкин эди. Бир очко ишлади ёки икки очко йўқотди дейиш нотўғри. Ҳамма нарса бўлиши мумкин эди.

- «Динамо»нинг мавсум бошланишига 10 кун қолганида Суперлигада қатнашиши аниқ бўлган бўлса-да, про-лигага мослаб тузилган жамоа ҳозирча ўзидан ёмон таассурот қолдирмаяпти. Балки футболчиларда қўшимча куч ёки характер пайдо бўлгандир? Ёки мураббийнинг роли каттадир?

- Техник-тактик томондан кучлироқ бўлган жамоаларга бас кела олмаслигимиз мумкиндир, аммо «Динамо»да ҳамма бир оилага айланган. Бизни Суперлигага чиқаришгани бежизга эмаслигини ўз ўйинларимиз ва натижаларимиз билан исботлашимиз керак. Ўзингиз айтганингиздек, бошида клуб асосан про-лига учун тайёргарлик кўраётганди. Кейин эса бизга Суперлига учун имконият ҳавола қилинди. Бундан эса албатта фойдаланмасак бўлмайди. Биласизми, «Динамо»даги ҳар бир футболчига Суперлигада ўзини кўрсатиш учун реклама бўлади. Балки кейинги йили яхшироқ клубларга ўтиб кетишар. Бунинг учун «Динамо» трамплин вазифасини бажаради. Кўз тегмасин, ҳозирча ишларимиз яхши.

- Дарҳақиқат, «Динамо»даги футболчиларга Суперлига ўзига хос реклама вазифасини бажариб беради. Бу борада сиз учун ҳам рекламами?

- Йўқ, реклама демаган бўлардим. «Динамо»да ёш ўйинчилар кўп. Биз эса уларга ўз тажрибамиз билан ўрнак бўлишимиз лозим. Тўғриси, мен «Динамо» билан узоқ йиллар давомида бирга ишламоқчиман. Реклама эса кўпроқ жамоадаги ёш ўйинчиларга керак. Уларнинг эса ҳали имкониятлари кўп. Бизнинг сафимизда терма жамоага тортадиган иқтидорли футболчилар бор, бунга аминман.

- Бунгача қуйи лигада ўйнадингиз. Масалан, ўтган йили про-лигада «Машъал» сафида тўп сурдингиз. «Динамо» билан ҳам про-лигага тайёргарлик кўраётгандингиз. Аммо воқеалар ривожи ўзгариб кетди. Ўшанда ўзингизни Суперлигага тайёрман деб ҳисоблаганмидингиз?

- Албатта. Футболчи ҳамма нарсага тайёр туриш керак. Аслида эса футбол мана шундай кутилмаган ҳолатлари билан ҳам қизиқ. Мисол учун «Бунёдкор»дан «Машъал»га қандай пайдо бўлиб қолганим ҳам тушунарсиз вазият бўлганди. Ваҳоланки, бир йил олдин олий лигада «Бунёдкор» билан юқори ўринлардан бирини эгаллагандик. Келаси йили эса про-лигада ўйнадим. Ўшанда «Машъал» билан Суперлигага чиқиш учун курашдик. Бу йил эса «Динамо» билан ҳам Суперлига йўлланмасини қўлга киритиш учун тайёргарлик кўраётгандик. Бироқ сюрприз туфайли Суперлигага чиқдик. Бундай пайтда барибир масъулият кўпроқ ёши катта футболчиларга юкланади. Мураббий натижага жавобгар. Шу билан бирга бундай пайтда тажрибали ўйинчиларнинг ҳам жавобгарлиги катта бўлади. Шунинг учун қўлдан келганича жамоани бир оила сифатида ушлаб туриш, биргаликда меҳнат қилиш ва Самарқанд футболини кўтариш мақсадида ҳаракат қиляпмиз.

- Олий лигада Воҳид Шодиев сифатида танилгансиз ва ўз сўзингизни айтган футболчисиз. Илк бор Суперлига номи остидаги чемпионатда қатнашяпсиз. Суперлигага асос солинганда эса сиз қуйи лигада эдингиз. Олий лига билан Суперлиганинг фарқларини нимада кўряпсиз? Ёки шунчаки қуруқ номи ўзгарган холосми?

- Ким нима деса десин-у, футбол ривожланяпти. «Навбаҳор» билан учрашувда ҳам ҳамма кўрдики, футбол анча тезлашган. Жисмоний тайёргарлик ҳам биринчи ўринга чиқиб қолди. Ўтган йили про-лигада ўйнаган бўлсам ҳам у ерда рақобат яхши бўлди. У ердан Суперлигага чиқиш учун рақобат кучли бўлди. Олий лига билан Суперлиганинг фарқи жуда катта. Ўйинлардаги ташкилотчилик борасида ҳам ўзгаришлар яққол билиняпти.

- «Динамо» бош мураббийи Даврон Файзиев сизни асосан захирадан майдонга туширяпти. Ҳозирги пайтда 90 дақиқа ўйнашга тайёр эмасмисиз?

- Бундай демаган бўлардим. Агар мени 90 дақиқага майдонга туширса, охиригача ўйнашга тайёрман. Ҳар бир мураббийнинг ўйин услуби турлича. Жамоамиздаги ёшларга ҳам кўпроқ имконият бериш кераклигини тушунаман. Майдонда 10 дақиқа ёки 90 дақиқа ўйнасам ҳам муҳими, жамоамнинг ғалабаси учун қўлимдан келганича ҳаракат қиламан.