Ван Дейк: "Ҳакам нимани қарор қилганини ўзи ҳам тушунмаган, деб ўйлайман"

"Ливерпуль" ҳимоячиси Виржил ван Дейк "Брентфорд"га қарши 9-турдаги учрашувда (2:3) содир бўлган баҳсли пенальти ҳақида фикр билдирди.

Учрашув ҳақида: 

"Бу ердаги мағлубият жуда аламли. Биз рақибнинг кучли томонларини ҳам, нима қилишларини ҳам яхши билардик. Улар сифати юқори жамоа эканини ҳисобга олганда, биз идеал ўйин намойиш этишимиз керак эди. Умуман олганда, бу кеча биз учун нохуш тугади. Буни қабул қилиш қийин, аммо ҳаёт давом этади". 

Пенальти ҳақида

"Билмайман. Ҳакам "тўп чизиқ устида эди" деди, аммо белгиланган нуқта жарима майдонидан икки метр нарисида бўлди. Ростини айтсам, нималар бўлаётганини тушунмадим. Охири у пенальти тайинлади, бу эса, албатта, хурсанд қилмади", – деди мерсисайдликлар сардори "TNT Sports"га берган интервьюсида.

Маълумот ўрнида, 59-дақиқада ван Дейк ўз жарима майдони чегарасида рақиб футболчиси Данго Уаттарани тўхтатди. Ҳакам Тим Робинсон аввалига жарима зарбаси тайинлади, аммо ёрдамчилари фол "Ливерпуль"нинг жарима майдони ичида бўлганини билдиришди. ВАР билан суҳбатдан кейин Робинсон видео-қайтаришни кўрмасданоқ пенальти белгилади.