Тер Штеген "ёрилди"

"Барселона" дарвозабони Марк-Андре тер Штеген катта баёнот эълон қилди. Аввалроқ, "Барса" германиялик футболчидан сардорлик боғичи олиб қўйилгани расман эълон қилинган эди. Бунга сабаб футболчи клуб учун жароҳати ҳақидаги тиббий хулосани имзоламагани бўлди. Бу хулоса "Барселона"га дарвозабоннинг жароҳати узоқ муддатли деб топилиши ва клубга келган янги футболчиларни лигадан рўйхатга олиш осонроқ бўлиши учун керак.

"Сўнгги ҳафталарда мен ҳақимда айтилган гапларнинг аксарияти мутлақо асоссиз. Шунинг учун мен воқеаларни ўзимнинг версиямда ҳурмат билан, аммо аниқ баён қилишни зарур деб ҳисоблайман. Жарроҳлик амалиёти ўтказиш қарори тиббиёт мутахассислари билан маслаҳатлашгандан сўнг қабул қилинди, у клуб томонидан тўлиқ маъқулланди ва ҳар доим менинг соғлиғим ва узоқ муддатли спорт карерамни биринчи ўринга қўйишни мақсад қилган, бу, албатта, "Барселона"нинг манфаатларига тўлиқ мос келади: совринларни ютишда давом этиш учун имкон қадар тезроқ майдонга қайтиш. Бундан ташқари, энг нуфузли мутахассислар менга эълон қилган тикланишнинг минимал муддати ҳақида жамоатчиликка маълум қилдим.

Шунингдек, баъзи тахминларга кўра, клубнинг барча трансферлари ва шартномаларини узайтириш операциядан олдин амалга оширилганини маълум қилмоқчиман. Шу сабабли, ҳеч қачон менинг мажбурий операциям ҳали кўп мавсумлар давомида кийиниш хонасини баҳам кўришга умид қиладиган бошқа ўйинчиларни рўйхатдан ўтказиш учун зарур бўлади, деб ўйламаганман. Бошқа ҳар қандай талқин менга адолатсиз ва ноаниқ бўлиб туюлади", - деб ёзган тер Штеген.

Шунингдек, Тер Штеген "Барселона"га садоқатини сақлаб қолгани ва ўзини аввалгидек профессионал ва ҳурмат билан тутишга ҳаракат қилаётганини таъкидлади. Футболчи мулоқот орқали юзага келган вазиятни ҳал қилиш мумкинлигига умид қилмоқда. Марк-Андре клуб раҳбарлари билан ҳамкорлик қилишга тайёр.