Шота Арвеладзе "Локомотив" устидан қозонилган 7:0 ҳисобидаги ғалабани "Бавария" - "Барселона" учрашувига қиёслади

Coca Cola Суперлига 12-туридан ўрин олган "Пахтакор" ҳамда "Локомотив" (7:0) жамоалари ўртасидаги ўйиндан сўнг, "шерлар" устози Шота Арвеладзе матбуот анжуманида иштирок этди.

"Дерби учун ноодатий ҳисоб бўлди. Бугунги ўйин "Бавария" - "Барселона" баҳсига ўхшаб кетди. Йигитлар учун хурсандман. Қийин даврдан ўтиб олдик. Яхши ўйнадик ва баҳсни назорат қилдик. Бешта алмаштириш амалга оширганда, ўйин суръатини бирдек сақлаш қийин, лекин биз буни уддаладик. Захирадан тушган футболчилар ўзларини кўрсатди. Уларнинг шундай яхши ишлаётганидан бахтиёрман. "Локомотив"га бундай қийин ҳолатдан тезроқ чиқиб олишларини тилайман.

Яқин орада терма жамоа йиғини бўлади. Умид қиламанки, бизнинг чемпионат ўйинлари ҳамда Чемпионлар Лигаси олдидан маъқул ҳолат топилади. Ўйинчилар терма жамоада ҳам ўйнашни хоҳлайди.

Натижа қандай бўлишидан қатъи назар мухлислар учун ўйнашда давом этамиз. Рақиб, мухлислар ҳамда ўз жамоангни ҳурмат қилиш лозим", - деди грузиялик мутахассис.