“Реал” Роналдуни қайтариш йўлини топди

“Реал” раҳбарияти жамоа тарихидаги энг зўр тўпурарлардан ҳисобланган Криштиану Роналдуни ортга қайтариш йўлини топган кўринади.

Ҳозирги пайтда мадридликлар португалиялик футболчи учун талаб қилинаётган 60 миллион еврони беришга тайёр эмас. Шу боис, “Қироллик клуби” хўжайинлари “Ювентус”га маъқул келиши кутилаётган вариант тайёрлаяпти.

Унга кўра, “Реал” Роналду трансфери учун “хамир учидан патир” қабилида 10 миллион евро тўлайди ва жамоа ярим ҳимоячиси Искони “Ювентус”га текинга бериб юборади.

Агар туринликлар бу вариантга кўнса, Криштиану Роналдуга бир йиллик шартнома таклиф қилинади.

Португалиялик юлдуз 2009-2018 йиллар давомида мадридлик шарафини ҳимоя қилган. Бу жамоа сафида Роналду тўрт марта Европа Чемпионлар лигасида зафар қучган ва тўрт бор “Олтин тўп” соҳиби бўлган.