“Реал”, арзон сотган юлдузингни қайтариб ол!

Италия чемпионатида иштирок этаётган “Комо” 2024 йилнинг ёзида “Реал”нинг асосий таркибига қабул қилинмаган Николас Пасни ўз сафига қўшиб олган эди.

Аргентиналик иқтидор эгаси учун италияликлар “Қироллик клуби”га атиги 6 миллион евро тўлаган. Мадрид суперклуби  мутасаддилари шартномага ўйинчини биринчи бўлиб қайта сотиб олиш ҳуқуқини киритган.

“Комо” спорт директори Карлальберто Луди мадридликларга вақт борида Пасни қайтариб олишни маслаҳат берди.

- “Реал” Пасни қайта сотиб олиш бандини ишга солиб, ўйинчини олиб кетиши мумкинлиги бу ҳақиқат. Мадрид клуби директорлари ўрнида бўлганимда, мен ҳам ўзимни бу трансферни амалга ошириш имкони борлигида бу ишга қўл уриш учун масъуллигимни ҳис қилган бўлардим.

Пас ниҳоятда иқтидорли, ажойиб ўйинчи. Балки Никонинг ўзи ҳам Мадридга қайтишни истаётгандир, чунки “Реал”дек жамоада ўйнаш ҳар бир футболчининг, айниқса, клуб тарбияланувчисининг орзусидир. Бизнинг “Реал” билан алоқаларимиз жуда яхши даражада, - деди Карлальберто Луди.

21 ёшли Николас Пас Transfermarkt портали экспертлари томонидан 55 миллион еврога баҳоланмоқда. “Реал” клубида ўз тарбияланувчисини арзонлаштиришган нархда қайта сотиб олиш ҳуқуқи бор.