Рамуш: "Роналду билан рақобат — бу табиий. Биз жамоага ёрдам бериш учун келганмиз"

ПСЖ ҳужумчиси Гонсалу Рамуш "Ан-Наср" форварди Криштиану Роналду билан Португалия терма жамоасидаги рақобат ҳақида фикр билдирди.

Португалия терма жамоаси Криштианусиз ҳам Арменияни ЖЧ-2026 саралаш босқичининг якуний учрашувида 9:1 ҳисобида мағлубиятга учратди ва Жаҳон чемпионатига йўл олди. Гонсалу мазкур баҳсда бир гол урди ва бир голли узатма амалга оширди.

– Сиз Роналду билан асосий таркибдаги ўрин учун рақобатлашяпсиз. Кўпроқ ўйин амалиётига эга бўлишни истармидингиз?

– Бу ерда ҳар бир футболчи жамоага ёрдам бера олади, мен ҳам шулардан бириман. Албатта, ҳар ким каби мен ҳам кўпроқ ўйин амалиётига эга бўлишни хоҳлайман.

– Арменияга қарши ўйин ҳақида нима дея оласиз?

– Бизда танлов деярли йўқ эди — фақат ғалаба керак бўлган. Рақибдан анча устун эдик, буни майдонда ҳам кўрсата олдик ва Жаҳон чемпионати финал босқичига чиқишни таъминладик, ўз имкониятларимизни намоён этдик.

Ҳаммаси самарадорликка бориб тақалади. Баъзан тўп дарвозага кирмаслиги ҳам мумкин. Бу учрашувда олдинги ўйинларга нисбатан кўпроқ вазият яратдик ва улардан самарали фойдаландик, режамизни яхши амалга оширдик. Шунинг учун ҳам бу йирик, ишончли ғалабани қўлга киритдик.

– Португалиянинг ЖЧ-2026да ғолиб чиқиш имкониятлари қандай?

– Қатнашаётган ҳар бир турнирда бизни фаворит деб ҳисоблашади, лекин мақсадга қадамма-қадам етиш муҳим. Март ойида яна ўртоқлик учрашувлари бўлади, олдинда эса Жаҳон чемпионатига пухта тайёргарлик кўриш жараёни турибди, — деди Рамуш "RTP Notícias" учун берган интервьюсида.