"Qo‘qon-1912"ning tayyorgarligi davom etmoqda. "Neftchi"dan futbolchi taklif qilindi

Yangi mavsumga tayyorgarlikni Qo‘qon shahrida olib borayotgan “Qo‘qon-1912” jamoasining futbolchilari kuniga ikki mahaldan mashg‘ulotlarda ishtirok etishmoqda.

Baxtiyor Ashurmatov shogirdlari kunning birinchi yarmida trenajyor zalida, kunning ikkinchi yarmidagi mashg‘ulotlarni esa stadionda olib borishmoqda.

Jamoaning tajribali hujumchisi Shohnazar Norbekov bugundan umumiy guruh mashg‘ulotlariga qo‘shildi. Norbekov AGMKga qarshi o‘yinda olgan jarohatidan butkul xalos bo‘lgan. “Shunqorlar” tarkibida bir nechta mahalliy yosh futbolchilar ham ko‘rikdan o‘tishmoqda. Bugungi mashg‘ulotlarga o‘tgan mavsumni “Neftchi” tarkibida o‘tkazgan yarim himoyachi Rustamjon Abduhamidov ham qo‘shildi.

Jamoada selektsiya ishlari bir muddat ham to‘xtagani yo‘q. Shu kunlarda tarkibga yana yangi futbolchilar kelib qo‘shilishi kutilmoqda.

“Qo‘qon-1912” jamoasining tajribali yarim himoyachisi Quvondiq Ro‘ziev o‘tgan mavsumning so‘nggi bahslarini kichik jarohatlar bilan o‘tkazgan edi. Quvondiq hozirgi kunda Toshkent shahrida davolash muolajalarini olib, salomatligini tiklash bilan band. Ro‘ziev “shunqorlar”ning Toshkentdagi mashg‘ulotlarida jamoa safiga qo‘shiladi, - deya xabar bermoqda, klub matbuot xizmati.