Ўрмондаги жангчи!

Эл-Капитано! Париж учун энг муҳим трансфер!

14 ёшли Серхиога Севилья кўчаларида велосипедда ҳаракатланишни ота-онаси ман этди. Қайсар ўспирин ўз айтганидан қолмайдиганлар сирасига кирар эди. У ўз "уловини" олди ва шаҳарга чиқди. Сайр қилар экан, кутилмаганда бахтсиз ҳодиса рўй берди. Натижада, у оёғидан лат еди. Бу жароҳат уни бир йил тўшакка михлаб қўйишини болакай тасаввур ҳам қилмаган эди.

Оғир кунлар бошланди. Болакайнинг отаси - Хосе Мария бир жиҳатга эътибор қаратди. Ўғлида кучли характер бор экан. У оғриқларга матонат билан дош берар, ҳеч қачон кўз ёш тўкмади. Aйнан ўша 365 кун ичида кичик Рамос ҳаётда ўз ўрнини топиш учун кучли бўлиш кераклигини англади. Ўша 12 ой ичида метин иродасини тоблаган йигитча кўп ўтмай жаҳон футболига дадил қадамлар билан кириб келди.

"Aфсона - Серхио Рамос", деб номланган ҳужжатли фильм экран юзини кўргач, мухлислар футболчининг фаолиятига оид кўплаб қизиқарли маълумотлардан хабар топди. Рамос фильмда ўз фикрлари билан ўртоқлашар экан, яна бир бор ЖЧ ва ЕЧЛ олтин медалларига эга чиқиш орзусида эканлигини яшириб ўтирмади. Кўп ўтмай, унинг режаларини ўзгартириб юборадиган воқеа содир бўлди. "Реал"нинг узоқ йиллик сардори Париж супер клуби билан шартнома имзолади.

ПСЖ - юлдузларга тўлиб-тошган "янги галактикос"га айланиб бормоқда. Ҳатто, улар ҳам Рамос қандай улкан наф келтириши мумкинлигини англаб турибди. Серхио, биринчи навбатда, ички муҳитдаги барқарорликни ва майдондаги тартибни юзага келтириши керак. ПСЖда етакчи бўлиши кутилган Неймар ортиқча вазн муаммосига дуч келган, Тьяго Сильва аллақачон "Челси"да ЕЧЛни ютди, Маркиньос ва Вератти камтарин йигитлар. Бу вазиятда "эл-капитано" ПСЖ учун энг керакли кадрга айланади. Боз устига, Почеттино ва Рамоснинг тезда тил топишиб кетишида муаммо бўлмайди.

"Эл-капитано" доимо таваккалдан чўчимайдиганлар сирасига кирган. У доим майдонда шер бўлган. Шу ўринда бир савол туғилади. У ўз жамоасини ҳам шерлардек "нара" тортишга мажбур қила оладими?
Тўғри, характери оғир эканлиги бор гап, лекин унинг туғма "жангчи" эканлигини ҳеч ким рад эта олмайди. Криштиану Роналду ўзининг пик формасида ҳам "Реал" кийиниш хонасини бўйсундирган Серхио учун осон бўлмаган давр яқинлашмоқда. Париждаги миллионерларни майдонда ҳар бир тўп учун шердек кураш олиб боришга мажбур этиш даркор.

Серхио ўз-ўзига талабчан эканлиги ҳайратда қолдиради. У Уэйн Рунидан катта бўлишига қарамай, янги чақирувлардан чўчимаяпти. Рунининг Испания пляжларида маст ҳолда тушган суратлари тарқалиб кетган бир пайтда, Рамос терма жамоадан чақирув олмаганидан ранжиди. Ўртадаги фарқни дарров англаган бўлсангиз керак. "Реал" Мадридда унинг севимли жамоадоши саналган Рафа Варан ҳам "Қироллик клуби"ни тарк этди. Парижда Кимпембе Рамос учун тандем ҳосил қилиши аниқ. Дарвозада Доннарумманинг бор эканлигини инобатга олсак, ПСЖ мудофаа чизиғини анча яхшилаб олди.

Рамосни олдинда улкан ғалабалар кутиб тургани аниқ. Шуниси аниқ-ки, Серхио Мадридни тарк этишни истагани йўқ. Турмуш ўртоғи - Пилар Рубио Парижга кўчиб ўтишга аввал бошидан қарши эди, бироқ "Реал" Рамос учун компрамисга боришни истамади. Флорентино Перес клуб афсоналари билан қандай хайрлашишини яхши биласиз. Рамос ҳам Переснинг принциплари қурбонига айланди. Рамос қалбда алам билан Мадридни тарк этди. Aйнан шу алам Париждаги фаолиятида унга кучли мотивация бериши аниқ.
Барча Лео Мессининг ПСЖга ўтиши ҳақида фикр билдирмоқда. Мен эса, клуб учун жорий мавсумдаги энг муҳим трансфери сифатида Рамосни кўрсатган бўлар эдим. Шу кунга қадар французлар катта ўйинларни бирортасини юта олмагани учун қаттиқ танқид остига олинган. Энди бу "касаллик"ка қарши кураш бобида беназир футболчи клубга ташриф буюрди. Рамос - фақат ғалаба қозониш учунгина футбол оламига кириб келган тоифасидан! У майдонда ғалаба учун қолганларда кўпроқ меҳнат қилишга ўрганган. Уни шу сифати учун ҳам яхши кўришади ва ардоқлашади.

Қаҳрамонимизнинг отаси бу вазият ҳақида билдирган фикрига эътибор қаратинг!

"Бу унинг характери! Ҳеч ким ундан буни илтимос қилмаган. Ҳаётнинг синовларига қарамай, Рамос ўзи танлаган йўлдан боришда давом этмоқда. У шунча йиллар давомида ўз-ўзи билан курашишдан тўхтагани йўқ".

Дарҳақиқат, сайёрамизнинг энг кўп соврин ютган ҳимоячиларидан бири бўлишига қарамай, Рамос янги марраларни забт этишдан тўхтамаяпти. Aйни дамда у ўзидан воз кечганларни хато қарор чиқарганини исботлаш мақсадида машғулотларга зўр бергани йўқ. У ҳеч кимга ҳеч нарсани исботлаши шарт эмас. Унинг асосий рақиби ўзи!

Я . У