Mbappe kutgan davr keldi

Kilian Mbappe o‘tgan yozda PSJ bilan yangi sharnoma tuzganidan keyin klub rahbariyatidan janubiy amerikalik yulduzlarning ta’sirini kamaytirishni, xususan, Neymarni sotib yuborishni talab qilayotgani haqida xabarlar tarqalgandi.

Darhaqiqat, Parij klubi mutasaddilari janubiy amerikalik bir necha futbolchidan qutildi. Neymar esa, ketishdan bosh tortib kelayotgandi. Endi braziliyalik yulduzning ham fikri o‘zgargan.

Matbuot bosimi va fanatlar e’tirozidan to‘ygan o‘yinchi har qanday yaxshi taklifni ko‘rib chiqishga tayyorligini bildirdi.

PSJ rahbariyati Chempionlar ligasida g‘olib chiqishga qodir jamoa shakllantirmoqchi. Endi ular nomdor yulduzlarni emas, asosan frantsiyalik yosh iqtidor egalarini bir maqsad yo‘lida birlashtirmoqchi.

Ana shu yangi loyihani Kilian Mbappe atrofida tuzishga qaror qilindi. Mbappe PSJda asosiy figura sifatida o‘ynaydi.