Mareska: "U jamoaga yordam beradi"

"Chelsi" Konferentsiyalar ligasi doirasida "Xaydenxaym" klubi ustidan 2:0 hisobida g‘alaba qozondi. Uchrashuvdagi gollarni Mudrik va Nkunku o‘z hisoblariga yozdirib qo‘ydi.

Bellashuvdan so‘ng "aristokratlar" bosh murabbiyi Entso Mareska Nkunkuning klubdagi kelajagini haqida gapirdi.

- Men Kristofer bilan bir necha kun oldin gaplashdim. Suhbat davomida u faqatgina ko‘proq daqiqalar xohlashini aytdi. Shuning uchun futbolchi yanvarda hech qaysi klubga sotilmaydi. U biz bilan qolib muvaffaqiyatga erishishimizga yordam beradi - deya ta’rif berib o‘tdi italiyalik mutaxassis.

Eslatib o‘tamiz, frantsiyalik vinger bu mavsum "Chelsi" safida 19 ta o‘yinda maydonga tushib, 11 ta gol va 1 ta golli uzatmaga mualliflik qildi. Uning Transfermarktdagi narxi 65 million evro deb baholanmoqda.