Манчестерлик футболчилар ўз ҳужумчисидан норози

“Манчестер Юнайтед”нинг бир гуруҳ футболчилари жамоа ҳужумчиси Расмус Хойлунднинг имкониятларига шубҳа билан қарамоқда ва унинг ҳаракатларидан норози.

Аслида бир неча ўйинчи 2023 йилнинг ёзида Хёйлунднинг “Аталанта”дан трансферига қарши чиққан. Чунки бу футболчи Манчестерга кўчиб ўтишдан бир ой олдин жамоанинг ўша пайтдаги бош мураббий Эрик тен Хаг манфаатларини ҳимоя қилаётган агентлик билан ҳамкорлик ўрнатган эди.

Шунга қарамай, “Юнайтед” Италия клубига қарийб 78 миллион евро тўлаб, даниялик ўйинчини ўз сафига қўшиб олди. Орадан икки йил ўтса ҳам, футболчиларнинг Хёйлундга муносабати ўзгармади.

Manchester Evening News нашрининг ёзишича, манчестерлик ўйинчиларнинг аксарияти 22 ёшли форвард ҳимояга ёрдам бермаслиги, прессингларда фаол эмаслиги ва иккинчи қаватдаги курашларни кўп бой беришидан эътироз қиляпти.

Хёйлунд “Манчестер Юнайтед” сафига қўшилганидан бери 95 та учрашувда қатнашиб, 26 та гол ва олтита ассист муаллифи бўлди. Унинг шартномаси яна уч йил давом этади.