“Ливерпуль” Арне Слотга ишонмай қўйди ва музокарани тўхтатди

Англия Премьер-лигасининг амалдаги чемпиони “Ливерпуль” янги чемпионатни кетма-кет бешта ғалаба билан бошлаганига қарамай, навбатдаги тўртта ўйинда қаторасига мағлубият аламини тотиб кўрди.

Бу инқироз жамоа бош мураббийи Арне Слотнинг келажагига соя солмоқда.

Мерсисайд клуби нидерландиялик мураббийни олиб келганида у билан 2027 йилнинг ёзигача амал қиладиган шартнома тузганди. Дебют мавсумдаги чемпионликдан кейин мутасаддилар Арне Слот билан ҳамкорлик узайтириш масаласида музокара бошлаб қўйганди.

Журналист Жеймс Уотленднинг маълум қилишича, кетма-кет мағлубиятлардан кейин клуб хўжайинлари 47 ёшли мураббий билан музокараларни тўхтатди.

“Ливерпуль” раҳбарияти Арне Слот билан жиддий суҳбатлашиб олганига қарамай, мураббийга босим тобора ошиб бормоқда.

Экспертларнинг аксарияти жорий мавсумда Арне Слот шогирдлари катта эҳтимол билан чемпионлик унвонини ҳимоя қила олмаслигини таъкидлаяпти.