Ҳусанов Шомуродовни “тахт”дан ағдарди!
Ўзбекистон миллий терма жамоаси ўз тарихида илк бор жаҳон чемпионати йўлланмасини қўлга киритганидан кейин футболчиларимизга эътибор янада кучайди.
“Nobel” YouTube-канали миллий терма жамоамиз аъзолари ҳақида қизиқарли маълумотларни беришда давом этмоқда. Бу гал Элдор Шомуродов Италияда ўзбек футболчиларига бўлган муносабат ва айниқса, “Манчестер Сити” вакили Абдуқодир Ҳусанов ҳақида қандай “гап-сўзлар” бўлаётганини гапириб берди.
- Италияда охирги икки йил давомида Ўзбекистон ҳақидаги саволларни қанчалик кўп беришяпти? Тасаввур қил, олдинга Пауло Дибала келиб, “Элдор “Сити”га ўтган футболчи қанақа йигит?” ёки “Терма жамоанг жаҳон чемпионатига чиқдими?”, деб сўраса...
- Йўқ. Улар ҳар доим Европада ўйнаганлар ҳақида сўрашади. Масалан, Ҳусанов ҳақида доим гап бўлади. Унгача, улар “Европада бир ўзинг ўйнайсанми?” дер эди. Мен “ҳа”, деб жавоб берсам, “унда сен қиролдек экансан-да”, дейишарди.
Энди улар “Ўзбекистонда янги қирол пайдо бўлдими? Ҳусанов катта клубда ўйнаяпти, унинг обрўси сеникидан ошиб кетди”, деб ҳазиллашишяпти.
- Сен нима деяпсан?
- Мен ҳа шундай, унинг даражаси меникидан баландроқ, деяпман.
Эслатиб ўтамиз, Элдор Шомуродов “Машъал” тарбияланувчиси ҳисобланади. Ўзбекистонда “Бунёдкор” сафида ҳам ўйнаган.
Моҳир ҳужумчи 2017 йили Россия Премьер-лигаси вакили “Ростов” жамоасига кўчиб ўтган. Бу клубда уч йил ўйнаганидан кейин А Серияга йўл олди.
2020 йилнинг октябрида Италиянинг энг қадимий жамоаси “Женоа” ўзбек футболчисини ўз таркибига қўшиб олди. Бир мавсумдан кейин Шомуродов мамлакатнинг энг нуфузли клубларидан ҳисобланган “Рома”га кўчиб ўтди.
Рим клуби ўйинчиси бўлишига қарамай, орада ижара асосида “Специя” ва “Кальяри”да ҳам ўйнаб келди.
29 ёшли ҳужумчимиз А Серияда жам 129 та учрашувда майдонга тушиб, ўз ҳисобига 19 та гол ҳамда 13 та ассист ёздириб қўйган.
Элдор Шомуродов “Рома”даги фаолияти давомида 2021 йили илк бор ўтказилган нуфузли халқаро турнир – УЕФА Конференциялар лигасида ғолиб чиқди.
2015 йилдан бери Ўзбекистон миллий терма жамоаси аъзоси ҳисобланган Элдор Шомуродов халқаро миқёсда энг кўп – 42 та гол урган ўзбек футболчисидир. Бу кўрсаткич эришиш учун форвардимиз терма жамоада 82 та ўйин ўтказган.
Comments