“Dahshat”! Anchelotti keskin tanqid bildirdi!

Evropa Chempionlar ligasi umumiy bosqichidagi so‘nggi uchrashuvda “Real” futbolchilari Frantsiyada “Brest”ni 3:0 hisobida mag‘lub etdi.

Rodrigoning dubli va Jud Bellingemning bir goli madridliklarni to‘g‘ridan-to‘g‘ri pley-offga olib chiqmagan bo‘lsa-da, ularga musobaqadagi ishtirokini davom ettirish huquqini kafolatladi.

Bellashuvdan keyin Karlo Anchelotti Chempionlar ligasining yangi formatini keskin tanqid qildi.

- Yangi format haqida nimalar deyishim mumkin? O‘yinlar soni juda ko‘p. Juda ko‘p o‘ynashga majbur bo‘lyapmiz. Biz uchrashuvlar sonini kamaytirishimiz kerak, aksincha yangilari qo‘shilib ketyapti.

Bu format menga yoqadimi yoki yo‘q, bu ahamiyatsiz. Lekin o‘yinlar dahshatli darajada ko‘p. Tanlash imkonimiz yo‘q, Chempionlar ligasini boricha qabul qilib, olg‘a qadam bosish kerak, - dedi Karlo Anchelotti.

Chempionlar ligasining keyingi bosqichiga qur’a 31 yanvar kuni tashlanadi. Musobaqaning umumiy bosqichidagi o‘rnidan kelib chiqqan holda, madridliklar “Seltik” yoki “Manchester Siti”ga ro‘baro‘ bo‘ladi.