Бруну Фернандеш Саудия клубларидан бош тортди

"Манчестер Юнайтед" сардори Бруну Фернандеш камида бир мавсум Европада қолади. "TalkSPORT" нашрининг хабарига кўра, у ёзда Саудия клубларидан келган учта таклифни рад этди.

"Ал-Ҳилол" хавбекни Клублар ўртасидаги Жаҳон чемпионатигача олиб келишга ҳаракат қилди, агент Мигел Пинью эса бир ҳафта Саудия Арабистонида музокараларда қатнашди. Фернандеш аввалига қизиқиш билдирган, аммо оиласи билан суҳбатдан сўнг МЮда камида яна бир мавсум қолишга қарор қилган.

Маълумотларга кўра, "Ал-Ҳилол" футболчи учун 80 миллион фунтдан ортиқ маблағ тўлашга тайёр бўлган. Шунга қарамай, хавбек шартномасида 60 миллион фунтлик компенсация мавжудлиги ҳақидаги хабарлар рад этилди.

Манбага кўра, Бруну Жаҳон чемпионати йилида Европада қолишни маъқул кўрган. Шу билан бирга, у 2026 йил ёзида Саудияга йўл олиши мумкинлигини ҳам истисно этмаган.

Португалияликка Криштиану Роналду жамоаси "Ан-Наср" ҳам қизиқиш билдирган. Роналду июль охирида шахсан сўров йўллаган, аммо Фернандеш унинг ўзига Европада қолиш нияти борлигини айтган.

Яна бир клуб – "Ал-Иттиҳод" ҳам футболчига қизиққан, аммо Карим Бензема жамоасида легионерлар лимити тугагани учун музокараларни давом эттириш имкони бўлмаган.