Boks. V.A.Zolotaryov xotirasiga bag‘ishlangan xalqaro turnirning navbatdagi kun janglari yakuniga etdi (barcha natijalar)

Andijonda V.A.Zolotaryov xotirasiga bag‘ishlangan xalqaro turnir davom etmoqda. Bugun, 3-kun bahslari nihoyasiga etdi.

Quyida barcha natijalar bilan tanishishingiz mumkin. G‘alaba qozongan bokschilar qoraytirilgan tarzda berib borilgan.

Kunduzgi dastur:

-57 kg: Abdumalik Halakov (Toshkent) - Ayubxon Baxtiyorov (Andijon)

Zo‘r jang, Ayubxon Baxtiyorov mahoratli raqibiga jiddiy qarshilik ko‘rsatdi, ammo Halakovning tajribasi qo‘l keldi.

-57 kg: Akiitay Rabatov (Qozog‘iston) - Jandos Nesipjan (Qozog‘iston)

Mazkur jangda Rabatovning qo‘li baland keldi.

-57 kg: Dilshod Abduvaliev (Toshkent viloyati) - Mirzabek Mirzahalilov (Farg‘ona)

Mirzabek Mirzahalilov 54 kgda amaldagi  O‘zbekiston chempioni Dilshod Abduvalievga qarshi ringga ko‘tarildi. 2-raund o‘tayotgan bir pallada Abduvaliev jarohat oldi va g‘alaba Mirzabekka berildi.

-57 kg: Nuriddin Kimsanboev (Andijon) - Samandar Xolmurodov (Jizzax)

Qiziqarli jang! Teng kurashlar ostida o‘tgan bahsda Samandar Xolmurodov omadli chiqdi.

-60 kg: Shunqor Abdurasulov (Toshkent viloyati) - Sirojbek Ismoilov (Andijon)

Dahshatli jang! Eslab qoling, kelajak yulduzi, Siroj Ismoilov! U tajribali Shunqor Abdurasulovni mag‘lubiyatga uchratdi. Qolaversa, 3-raundda nokdaunga ham uchratdi.

-60 kg: Fayozbek Hakimov (Andijon) - Erasil Tankay (Qozog‘iston)

Erasil Tankay teng kurashlar ostida kechgan jangda g‘alaba qozondi. Hamyurtimiz o‘z yurishini to‘xtatdi.

-60 kg: Dilshod Abdumurodov (Surxondaryo) - Shamshirbek Mirzabekov (Andijon)

Taktik kurash ostida kechgan bahsda Dilshod Abdumurodovdan aqlli jang va u yarim finalda!

-60 kg: Shamsiddin Kimsanov (Andijon) - Adham Muhitdinov (Toshkent viloyati)

Yaxshi saviyadagi jang, Muxitdinov qiyin kechgan bahsda g‘alabaga erishdi. 

-63,5 kg: Mujibillo Tursunov (Andijon) - Ertugan Zeynulinov (Qozog‘iston)

Qiyin kechgan jangda Mujibullo Tursunov harakter ko‘rsata oldi va xakamlarning yakdil qaroriga ko‘ra, g‘alaba qozondi.

-63,5 kg: Suxrob Abdullaev (Yoshlar terma jamoasi) - Jahonmurod Imomaliev (Andijon).

Jahonmurod Imomaliev qizg‘in va shiddatli kechgan jangda g‘alaba qozondi.

Kechki dastur:

-63,5 kg: Shohruxbek Kenjaev (Andijon) - Aydos Tagaybaev (Toshkent viloyati)

Aydos Tagayboev super jangda g‘alaba qozondi.

-63,5 kg: Asadbek Abdiraimov (Navoiy) - Ruslan Abdullaev (Toshkent viloyati)

Osiyo va O‘zbekiston chempioni Ruslan Abdullaev raqibiga xech qanday imkoniyat qoldirmadi.

-67 kg: Javlon Yo‘ldoshev (Andijon) - Miras Ertanov (Qozog‘iston)

Javlon Yo‘ldoshev faoliyatidagi yorqin janglardan birini o‘tkazdi va xaqli tarzda g‘alaba qozondi.

-67 kg: Jahongir Egamberdiev (Yoshlar terma jamoasi) - Bilolbek Ixvolov (Andijon)

Bilolbek Ixvolov murosasiz kechgan jangda irodali g‘alabani qo‘lga kiritdi.

-67 kg: Bekzod Hamidov (Buxoro) - Asilbek Muhammadjonov (Andijon)

Iste’dodlar to‘qnashuvida Buxoro viloyati vakilining qo‘li baland keldi.

-67 kg: Mirzahmat Mirzabekov (Andijon) - Jahongir Rahmonov (Toshkent viloyati)

Teng va murosasiz kurashlarga boy kechgan jangda Toshkent viloyati sharafini himoya qilayotgan Jahongir g‘olib deb topildi. Mirzabekov garchi mag‘lub bo‘lgan bo‘lsa-da ajoyib jang o‘tkazdi.

-71 kg: Iqboljon Xoldarov (Andijon) - Sherzod Qodirbaev (Qoraqalpog‘iston Respublikasi)

Iqboljon Xoldorovning havaskor boksga moslashishi biroz qiyinroq kechmoqda. Shunday bo‘lsa-da, g‘alabani qo‘lga kiritdi.

-71 kg: Havasbek Abdullaev (Andijon) - Kamron Turg‘unboev (Farg‘ona)

Kamron jarohat olganligi bois jangni davom ettira olmadi va g‘alaba Havasbekka yozildi.

-71 kg: Otabek Turdixo‘jaev (Andijon) - Muxsinbek Korabaev (Andijon)

Ikki andijonlik bokschining qarama-qarshiligida Muxsinbek Qoraboev g‘alaba qozondi.

-71 kg: Sherjahon Mirzabekov (Andijon) - Suxrob Qayumov (Buxoro)

Ooo super jang! Shiddatli kechgan qarama-qarshilikda Sherjahon Mirzabekov aniqroq harakat qildi va navbatdagi bosqichga yo‘l oldi.

-75 kg: Saidjamshid Ja’farov (Buxoro) - Jamshidbek Tojiboev (Andijon)

Saidjamshid Ja’farovdan o‘ziga xos master-klass! U g‘alaba qozonib, yarim finalga yo‘l oldi.

-75 kg: To‘rabek Habibullaev (Yoshlar terma jamoasi) - Login Petrov (Navoiy)

To‘rabek Habibullaev jangni davom ettira olmaganligi sababli g‘alaba Login Petrovga yozildi.

-75 kg: A’loxon Abdullaev (Namangan) - Sadimboy Nasriddinov (Andijon)

Har qanday chempionat bezagiga ayblanuvchi jangda A’loxon Abdullaev g‘alaba qozondi.

-75 kg: Abdumalik Boltaev (Tojikiston) - Abdulaziz Abdupattaev (Andijon)

Abdulaziz Abdupattaev qiziqarli kechgan jangda zafar quchdi.

Shu bilan xotira turnirining bugungi kun bahslari nihoyasiga etdi.