Бахтиёр Ҳамидуллаев: "Мен Ўзбекистоннинг эмас, "Андижон"нинг афсонасиман"

Бахтиёр Ҳамидуллаевни танимаган мухлис бўлмаса керак. Ўз пайтининг моҳир ҳужумчиси эди. Тўпурарликни ёқтирадиган, гол уришга чанқоқ футболчи сифатида яхши эслаб қолганмиз. У ўзбек футболининг афсоналари қаторидами-йўқми, бунга мухлислар баҳо беришади. Куни кеча Sports.uz мухбири айрим масалаларда у билан суҳбатлашди.

- Ўзбекистон ва Италия афсоналари ўртасидаги ўйин тез орада бўлиб ўтади. Ушбу учрашув учун Ўзбекистон афсоналари терма жамоаси таркиби эълон қилинди. Лекин у ерда сизга жой топилмаган...

- Таркибдан жой олишим хаёлимга келгани йўқ. Мени ҳам чақиришлари мумкинлиги ҳақида ўйлаганим ҳам йўқ. Таркибни кўрдим, барча чақирилганлар лойиқ, деб ўйлайман. Мени таклиф қилишади, деб умуман ўйламайман ҳам. Нимагаки, мен Ўзбекистон афсонаси эмасман, “Андижон” афсонасиман.

- Шоу ўйинни қаерда кўрмоқчисиз?

- Агар 18 майда мураббийлик учун ўқиш бошланса, бевосита ўйингоҳдан кўрамиз. Мабодо, ўқишимиз кечроқ бошланса, уйда ёки чойхонада яқинлар билан кўраман.

- Умуман олганда, мазкур шоу ўйинига муносабатингиз қандай? Барибир сизда ҳам бу даражадаги учрашувда қатнашиш истаги бўлса керак?!

- Албатта, бундай рақибга қарши тўп суришга ҳамма хоҳиш билдиради. Италия афсоналарига қарши ўйнаш катта бахт. Лекин мен ҳозир ўйнайдиган иштиёқда эмасман. Футбол ўйнашга иштиёқ сўнгган.

- Лекин водийдан ҳам чақирилганлар бор. Масалан, сиз яхши билган собиқ ҳужумчилар – Шуҳрат Мирҳолдиршаев ва Носир Отақўзиев...

- Сиз санаб ўтган инсонлар ҳозирги кунда ўз вилоятлари футбол ассоциацияларининг раҳбарлари ҳисобланади. Уларни бугунги футболимиз учун қўшаётган ҳиссалари бор. Шу сабабдан улар бунга лойиқ. Мен эса анчадан бери футболдан ташқаридаман.

- Футболдан иштиёқингиз сўнишига нима сабаб? Ахир футболда ўзига яраша из қолдиргансиз-ку.

- Баъзи-баъзида хоҳишим бўлиб қолса, фахрийлар жамоасига бориб ўйнаб турибман. Унда ҳам бир йилда бир бўлиб қолади. Аммо хоҳишим ҳам, истагим ҳам йўқ. Мураббийликда эса албатта иштиёқим бор. Яқинда “А” лицензиянинг биринчи модулини тугатиб келдик. Насиб қилса, иккинчи модулига чақиришади.

- Мураббийликдаги режаларингиз қандай? Ўтган вақт давомида хизматингизга таклифлар бўлдими?

- Ўзимизни Суперлигадан эмас, пастки лигалардан таклифлар бўлди. Асосий мақсад ҳақиқий футболга қаратилган бўлса, шунда ишлашни маъқул, деб биламан. Бундан ташқари, Қирғизистондан таклиф бўлди. Кейин футболга ихтисослашган ҳар хил мактаблардан чақиришди.

- Сир бўлмаса, Қирғизистоннинг қайси клубидан хизматингизга қизиқиш билдирилганди?

- Ошнинг “Алай” жамоасида президентликка иккита номзод бор эди. Ўшалардан бири менга алоқага чиқиб, агар клубда фаолият олиб борадиган бўлсак, сиз билан ишлаймиз, деган таклифни илгари сурганди. Клуб президентлигига бошқа даъвогарнинг номзоди маъқул кўрилди.

- Суперлига билан про лигани кузатяпсизми? Қанчалик ўзгаришларни кўряпсиз?

- Яқинда мураббийлик ўқишида Шамиль Тагирович дарс ўтди. Унинг маърузаларини мароқ билан эшитдик. 2017 йилдан 2022 йилгача ҳар жабҳада фақат орқага кетиш бўляпти экан. Мен ҳам шу фикрга қўшиламан. Олдинги футболимиз ҳозиргисидан анча кучлироқ эди. Аммо ҳозир ҳам ижобий томонга ўзгаришлар бўляпти. Шуни айта оламанки, биринчи лигадан исталган жамоа про лигага чиқиб кетса бўлади. Про лигада ҳам шундай. 4-5 та жамоа Суперлигага чиқиш учун тенг кучга эга экан.