“Барса” уч юлдуздан воз кечди

“Барселона”ни Испания чемпионига айлантирган бош мураббий Ханс-Дитер Флик янги мавсум олдидан жамоа таркибини тартибга солишни режалаштирмоқда.

Германиялик мутахассис таркибда ортиқча ўйинчиларнинг борлиги ички муҳитга салбий таъсир қилишини таъкидлаяпти. Деку бошчилигидаги спорт бўлими мутасаддилари ҳам ярим ҳимоя чизиғида ижрочилар керагидан зиёд, деган хулосага келди.

Sport нашрининг ёзишича, каталонияликлар таркибга кириши қийин кечиши кутилаётган уч нафар футболчи – Фермин Лопес, Марк Касадо ва Андреас Кристенсенни сотиб юбормоқчи. Чунки ҳозирнинг ўзида асосий таркибга кириш учун Френки де Йонг, Педри, Гави, Дани Ольмо ва Марк Берналь ўртасида кучли рақобат бошланган.

Бу ўйинчиларнинг ҳар бири Касадодан анча устун. Каталонияликлар Марк Касадони 30 миллион евродан кам бўлмаган таклифга қўйиб юборади.

Фермин Лопес трансфери бўйича “Манчестер Юнайтед” иш олиб боряпти. Рубен Аморим жамоасига қўшилишга мойиллик билдирган испан футболчиси АПЛнинг бошқа клублари ва Саудия Арабистонидан бўлган таклифларни рад этди.

Даниялик Кристенсен Фликка умуман керак эмас. Клуб хўжайини Жоан Лапорта бу ярим ҳимоячининг кетиши янги ижрочиларни қайдномадан ўтказишга йўл очишини таъкидлади.