“Барса” Чемпионлар лигасини “ёндирган” юлдузни олмоқчи

Испаниянинг амалдаги чемпиони “Барселона” ҳужум чизиғини Франция чемпионати ва Европа Чемпионлар лигаси ғолиби Дезире Дуэ билан кучайтирмоқчи.

Indykaila News манбасининг маълум қилишича, Каталония суперклуби тез орада 20 ёшли футболчининг трансферини бош мақсад қилган янги лойиҳани бошлайди.

Клуб хўжайинлари жамоани қисқа фурсатда Европа футболи гегемонига айлантирмоқчи ва бу жараёнда асосий вазифани Ламин Ямал ва Дезире Дуэ тандемига юкламоқчи.

Дезире аслида “Ренн” тарбияланувчиси ҳисобланади. “Пари Сен-Жермен” ҳужум чизиғининг учала нуқтасида ўйнай оладиган иқтидорли футболчини 50 миллион еврога трансфер қилган эди.

ПСЖда ишлари юришиб кетган Дуэ дебют мавсумидаёқ мамлакат чемпиони ва Чемпионлар лигаси ғолиби бўлди. Айниқса, унинг Чемпионлар лигаси финалида “Интер” дарвозасига иккита гол ургани салоҳиятининг ёрқин намунаси бўлди.

Ўтган мавсум дами 61 та учрашувда 16 тадан гол ва ассист қайд этган Дуэнинг трансфер нархи Transfermarkt  портали экспертлари томонидан 90 миллион еврога баҳоланмоқда. Унинг пойтахт клуби билан меҳнат шартномаси 2029 йилнинг ярмигача тузилган.