Баҳром Ҳайдаров: "Ютишимиз мумкин эди, рақиб пешқадам бўлса-да, ютқазганимиз аламли бўлди"

Суперлиганинг 9-турида “Қўқон-1912” жамоаси ўз майдонида ОКМКни қабул қилди. Гарчи қўқонликлар учрашувда ҳисобни очишган бўлса-да, беллашув якунига қадар ўз дарвозасидан учта тўп ўтказиб юбордилар ва 1:3 натижаси билан имконият бой берилди. Ўйиндан кейин мезбонлар бош мураббийи Баҳром Ҳайдаров матбуот анжуманида иштирок этди.

- Ютқазган ўйинда таҳлил қилиб кейин гапириш керак. Албатта, ташаббус ОКМК жамоасида эди. Иккинчи рақам билан ўйнашга ҳаракат қилдик ва бунинг уддасидан чиқаётгандик. Бундай жамоага қарши ҳимояланиш қийин. Қандайдир вазиятларда эпладик. Режамизга асосан ҳужумлар уюштириб, голга ҳам айлантирдик. Футболчиларимиз катта меҳнат қилишди. Бирортаси юзаки қарамади. Максимал кучларини беришди. Қўпол хатолар ҳисобига “Бунёдкор”да ҳам гол ўтказиб юборгандик. Яна шунга ўхшаш вазият. Футболчини руҳий томондан тайёр эмаслигими, яна шу нарсага олиб келди.  1:0 пайтида қарши ҳужум пайтида жуда яхши имкониятга эга бўлгандик. Ҳисобни 2:0 га етказганимизда умуман бошқача натижа бўларди. Лекин футбол шундайки, 30 сония ичида ўйин ҳақидаги фикрлар ўзгариб кетди. Бу эса жамоа, мураббийлар, футболчилар учун ижобий тарафга ҳам ишлаши мумкин. Бизни хатолар устида ишлашга мажбурлайди. Футболчиларга ўз ҳақларидаги фикрларини ўзгартиришга туртки бўлиши мумкин. Ўз уйимизда биринчи ўриндаги жамоага бўлса ҳам мағлубиятга учраганимиз аламли бўлди. Чунки ютишимиз ҳам мумкин эди. Ҳозирча учрашув тўғрисидаги фикрлар шу.

- Маликжонов билан Кондратюкни ўйинни асосий таркибда бошлашмагани кўпчиликни ҳайрон қолдирди. Жароҳатлари бормиди ёки бошқа режа билан боғлиқмиди?

- Бундай муаммолари йўқ эди. Кондратюкга келсак, у кўп ўйинларда ўйнади. Жасур Холтўраев ўйнамаган маҳалда унинг ўрнига кучлироқ жамоаларга қарши ўйнаганида янада фойдалироқ ўйинчи сифатида кўрингани учун шундай қарорга келдик. Иқбол Маликжонов эса учта ўйинни ўтказиб юборди. Футболда рақобат бўлади. Бизда ҳам рақобат бор. Шунинг учун ўтган ўйинга нисбатан унинг позициясидаги футболчиларни олиб ташлашга ҳаққимиз йўқ эди. Чунки улар ҳам ёмон ўйин кўрсатишмаётганди. Мағлубият бўлганида Иқбол ёки Шота ўйнаганида ундай-бундай бўларди, дейишлари мумкин. Айтяпман-ку, 30 сония ичида ўйиндаги умумий ҳолат ўзгариб кетди. Бу оддий рақобат, ким биринчи тайёр бўлса ўша майдонга тушади.  

- Аслиддин Тоштемировнинг жароҳати жиддийми? “Насаф” билан учрашувда майдонга туша оладими?

- Ҳозирни ўзида аниқлаш қийин. Оёғини тортиб олди. Қайта кўриб чиқилгач, натижаси айтилади.