"Andijon" bosh murabbiyi haqida yangilik

“Andijon” klubi qishki selektsiyada bir qator yangi futbolchilar bilan shartnomalar imzolanganini yaxshi bilasiz va bu xususida siz muxlislar uchun ma’lumotlar berib bordik.

Jamoa ishqibozlari uchun yana bir ma’lumotni taqdim etmoqchimiz. Gap shundaki, klub bosh murabbiyi Aleksandr Xomyakov bilan amaldagi shartnoma uzaytirildi. Bu xususida "Andijon" matbuot xizmati xabar bermoqda. Klub rahbariyati unga to‘liq ishonadi va qo‘llab-quvvatlashda davom etadi.

Ma’lumki, Aleksandr Andreevich 2022 yilning 15 dekabr kuni rasman “Andijon” bosh murabbiyi sifatida ish boshlagan. O‘tgan yili "Burgutlar" Xomyakov boshchiligida ajoyib sarguzashtlarni o‘tkazdi. Yoqimli va esda qolarli onlari ko‘p bo‘ldi. Albatta, bunda bosh murabbiyning mehnati va roli katta. Jamoaning tanlagan yo‘li va strategiyasiga Aleksandr Xomyakov to‘la-to‘kis mos tushadi. Shu bois ham rahbariyat ushbu mutaxassis bilan hamkorlikni yana uzaytirishga qaror qildilar.

Yangi mavsumda ham muxlislarning murabbiydan va albatta jamoadan umidi katta. Aytish lozimki, 5 mart kuni 55 yoshini qarshi oladigan Aleksandr Andreevich futbolchilarni chempionatga jiddiy ravishda tayyorlamoqda. Yangi mavsumda ham Xomyakov va uning jamoasi etakchilarga yana jiddiy muammolar tug‘dirishi katta ehtimol...