Нью-Йоркда ўзбек футбол жамоалари «Мустақиллик кубоги» учун беллашади
2017 йилнинг 17 сентябрь куни Нью-Йоркнинг Бруклин мавзесида иккинчи маротаба ташкил этиладиган "Мустақиллик кубоги" мусобақаси ўтказилади.
Турнир ташкилотчиларидан Санъат Шариповнинг SPORTS.uz ахборот порталига маълум қилишича, мусобақада АҚШнинг турли штатларида истиқомад қилаётган ватандошларимизнинг қатнашиши режалаштирилмоқда.
Ташкилотчилар ушбу турнирда иштирок этишни истаган жамоалардан 10 август санасигача аризаларни қабул қилишини маълум қилади.
Эслатиб ўтамиз, 2016 йилда ўтказилган турнирда Нью-Йорк, Пенсильвания, Нью-Жерси, Мэриленд ва пойтахт – Вашингтон шаҳарларидан ўзбекистонлик ватандошларимиз саккизта жамоага бўлинган ҳолда иштирок этишганди. Илк бор ўтказилган мусобақа бош соврини Нью-Йоркнинг "Пахтакор" жамоасига насиб қилганди. Бу йил эса, у каттароқ ва кенгроқ кўламда ўтказилиши мақсад қилинган.
- Биз бу йил ҳам иштирок этишни истаган ватандошларимизни Нью-Йоркнинг Бруклин мавзесида кутиб оламиз, - дейди Санъат Шарипов. - Ташкилотчилар томонидан ўзбекча палов сайли ва дастурхон ёзиш кўзда тутилган. Футбол мусобақасида қатнашадиган жамоа футболчиларининг оила-аъзолари учун ҳам кўнгилочар тадбирлар режалаштирилган. Мурожаат учун +1 (718) 737-23-19 телефон рақамига қўнғироқ қилишлари мумкин.
Фикрлар