2024 йилнинг ёзида “Пари Сен-Жермен” билан шартномасини тугатиб, “Реал”га кўчиб ўтган Килиан Мбаппе қисқа фурсат ичида жамоанинг энг асосий ўйинчиси мақомига кўтарилди.
“Қироллик клуби” 26 ёшли франциялик тўпурар трансфери бўйича янги таклиф олди. Нуфузли манбалардан fichajes.net сайтининг ёзишича, Саудия Арабистонининг “Ал-Ҳилол” клуби Мбаппе трансфери учун мадридликларга 350 миллион евро миқдорида бадал пули таклиф этган.
Шайхлар Мбаппенинг ўзига тўрт йиллик битим ва унга кўра ҳар мавсум учун 300 миллион евро миқдорида маош ажратишни ваъда қилмоқда.
Араблар Килиан Мбаппени Саудия Арабистони футболи рамзига айлантириш ва бу орқали жаҳон футболи жамоатчилиги эътибори ва эътирофини қозонишни мақсад қилган.
Манбада таъкидланишича, “Реал” бу таклиф қанчалар жозибадор бўлмасин, уни рад этган. Чунки “Қироллик клуби” Килиан Мбаппени узоқ муддатли лойиҳанинг ўзаги сифатида кўради.
Қолаверса, Мбаппенинг ўзи ҳам моддий манфаатдорликдан кўра, айни кучга тўлган пайтида жаҳоннинг энг қудратли клубида кўпроқ соврин ютиш ва футбол оламида чуқур из қолдириш вариантини танлади.
Фикрлар