«Андижон» баъзи футболчиларини ижарага берди

Янги мавсумда ўз олдига жиддий мақсадларни қўйган "Андижон" ўз таркибини сезиларли тарзда кучайтирди.

Клуб матбуот хизматининг хабар беришича андижонликлар мавсумни ўз сафларида бошлайдиган футболчиларга ойдинлик киритиб олишди. Бош мураббий томонидан танлаб олинган, 25 нафар футболчи ЎзПФЛнинг рўйхатидан ўтказиб бўлинди. Айтиш керакки, таркибда юзага келган рақобат туфайли захирада қолиб кетиши кутилган айрим умидли футболчилар раҳбарият ва мураббийлар штабининг қарорига мувофиқ, бошқа жамоаларга ижарага берилди. Хусусан ҳимоячи Қаҳрамон Маҳамаджоновга Фарғонанинг «Истиқлол» жамоаси қизиқиш билан чиқгач, 28 ёшли футболчи ушбу жамоага бир йил муддатга ижарага берилди. Ундан ташқари андижонлик иқтидорли футболчилар - Бахтиёр Қосимов билан Жаҳонгир Маҳсудов Про-лиганинг «Б» гуруҳида иштирок этувчи «Хотира-79» жамоасига ижарага берилди.

Ушбу футболчилар биринчи даврада янада кўпроқ ўйин амалиётига эга бўлиб, ўйин савиясини оширса, кейинчалик яна «Андижон»га қайтиши мумкин. «Андижон» футбол клуби юқорида номлари келтириб ўтилган футболчиларнинг келгуси фаолиятига омад тилайди.