Юз миллион евро турадиган юлдузча ўзига суперклуб танлади

«Борнмут» клубининг 19 ёшли ҳужумчиси Эли Крупи ёзги трансфер ойнасидан «Пари Сен‑Жермен»ни ўзининг асосий варианти сифатида кўраётгани хабар қилинмоқда. Бу ҳақда Transfer News Live нашри ижтимоий тармоқдаги саҳифасида маълумот берди.

Футболчининг тахминий трансфер баҳоси 100 миллион евро атрофида баҳоланмоқда. Айнан шу юқори сумма ҳозирча «ПСЖ»нинг фаол қизиқишини пасайтираётгани айтилмоқда. Шу билан бирга, «Борнмут» талаб қилаётган нархни туширса, вазият кескин ўзгариши мумкин.

Крупига нисбатан қизиқиш фақат парижликлар билан чекланмайди. Аввалроқ унга «Арсенал» ва футболчининг ўйинларини яқиндан кузатиб бораётган «Манчестер Сити» томонидан ҳам талабгорлар борлиги ҳақида хабарлар тарқалган эди. Апрель ойида эса мюнхенлик «Бавария» ҳам ёш форвард номзодига жиддий эътибор қаратгани маълум бўлган.

Ўтган мавсумда Эли Крупи «Борнмут» таркибида 35 ўйинда майдонга тушиб, 13 та гол урди. Transfermarkt маълумотларига кўра, ҳужумчининг бозор қиймати 70 миллион еврони ташкил этади. Унинг клуб билан амалдаги шартномаси 2030 йил ёзигача мўлжалланган.