Абдумалик Халоковнинг қулоғини тишлаб олган россиялик жаҳон чемпиони ўзбек бокчисини айблади

Россия терма жамоаси аъзоси, жаҳон чемпиони Всеволод Шумковнинг таъкидлашича, ўзбекистонлик олимпия чемпиони Абдумалик Халоков Дубайда 2025 йили бўлиб ўтган IBA жаҳон чемпионати финали атрофидаги можародан кейин реванш жангидан ўзи воз кечган. 

«Ҳаммага саломлар. IBA матбуот анжуманидан видеони кўрдим ва у ерда айтилган гаплар фақат шов-шув учун қилинганини айтишни истайман. Чунки Умар Назарович Кремлёв жаҳон чемпионатидан кейин бир неча бор реваншни таклиф қилган — ҳам Тошкентда, ҳам Ўзбекистоннинг ўзида. Лекин Халоков жамоаси рози бўлмади. 

Мен эса ҳозир ҳам исталган вақтда, исталган жойда 6, 8 ёки 10 раундлик жангга тайёрман. Энг муҳими — розилик беринг. Ёки бу мавзуни бошқа кўтарманг. Ҳаммага яхшилик тилайман», — деган Шумков.

Эслатиб ўтамиз, Дубайдаги IBA жаҳон чемпионати финалида 60 килограммгача вазн тоифасида Шумков ва Халоков ўртасидаги жанг учинчи раунд якунига яқин содир бўлган воқеа туфайли катта баҳс-мунозараларга сабаб бўлган эди. 

Клинч пайтида россиялик боксчи рақибининг қулоғини тишлаган, ўзбекистонлик чарм қўлқоп устаси вакиллари бунга кўрсатган кескин эътирозларига қарамай, рефери жанг давомида ҳеч қандай жазо чорасини қўлламаган. Ҳақамлар эса баҳсли қарор билан (4:3) ғалабани ва олтин медални россиялик спортчига берган.

Кейинчалик ИБАнинг интизомий ва тиббий комиссиялари ушбу ҳолатни тасодифий деб баҳолади ва жанг натижасини ўзгаришсиз қолдирди. Шу билан бирга, Шумковга жарима сифатида мукофот пулининг 50 фоизини тўлаш жазоси қўлланилди.

Ҳусановга қийин ўйинда неча балл қўйилди?

Кутилмаганда майдонга тушган Ҳусановнинг ўйини қандай баҳоланди?