“Бавария” Ҳарри Кейннинг хет-трики эвазига Германия кубоги финалида “Штутгарт” устидан 3:0 ҳисобида зафар қучиб, Бундеслига чемпионлигидан кейин яна бир нуфузли совринни қўлга киритди.
Жамоанинг 22 ёшли ўйиничиси Александар Павлович болалигидан Германия кубогини ютишни истаганини ва бу орзуси ушалганидан бахтиёр эканини айтди.
- Бу ақлбовар қилмас туйғу, жуда завқли. Албатта, болалигимдан бу ҳақда орзу қилардим. Энди эса буни ҳар ҳафта, ҳар ой ҳис қилиб келяпман. Бугун биринчи марта кубокни ютиб олдим. Буни сўз билан таърифлаб бўлмайди. Ҳатто тасаввур қилганимдан ҳам яхшироқ экан, - деди Павлович.
Павлович сўнгги йилларда ўз ривожланишида сезиларли ўсишга эришди. Бироқ келаси мавсумда уни янада катта синовлар кутмоқда.
Маълумотларга кўра, тажрибали футболчи Леон Горецка Мюнхен клубини тарк этган тақдирда Павлович асосий таркиб футболчиси сифатида кўпроқ масъулиятни ўз зиммасига олишига тўғри келади.
Бу унинг фаолиятидаги муҳим синовлардан бири бўлади. Аммо футболчининг шу пайтгача учраган қийинчиликларни муваффақиятли енгиб ўтганини ҳисобга олсак, у бу вазифани ҳам уддалаши мумкин.