“Yerevan Mayor Cup” турнири. Икки боксчимиз ярим финалда!

Арманистон пойтахти Ереванда ўтказилаётган, бокс бўйича “Yerevan Mayor Cup” турнирининг бугунги кун дастуридан ўрин олган, Самандар Олимов иштирокидаги жанг якунланди. У мезбонлар вакили Арман Арзуманянга қарши баҳс юритди. Қизиқарли кечган жангда Олимов 4:1 ҳисобида ғалаба қозонди ва ярим финалга йўл олди.

-70 кг вазн тоифаси чорак финал баҳсида Иқболжон Холдоров Молдова вакили Владимир Назимкога қарши рингга кўтарилди. Ҳар уч раундда рақибига хеч қандай имконият қолдирмаган ҳолда, 5:0 ҳисобида ғалабага эришган Холдоров ярим финалга йўл олди.

Эртага ушбу турнир ярим финалида яна икки вакилимиз Тўрабек Ҳабибуллаев ҳамда Шаҳзод Музаффаровлар рингга кўтарилади. Бу ҳақда Ўзбекистон Бокс федерацияси хабар бермоқда.