Яхшибоев Чемпионлар лигаси билан хайрлашди, лекин...
- 7-декабр 2021, 18:51
- Zohir Toshxo’jayev
- 1
- Футбол
Бугун тунги соат 01:00 да “Шериф” жамоаси Чемпионлар лигасининг гуруҳ босқичидаги сўнгги учрашувини Украинада “Шахтёр”га қарши ўтказади.
Молдова клуби гуруҳ баҳслари якунланмасидан ўз квартетида учинчи ўринни олиши маълум бўлиб улгурган. Тирасполликлар мусобақанинг плей-офф босқичига чиқа олмаган бўлса-да, УЕФАнинг иккинчи турнири – Европа лигасида иштирокини давом эттиради.
“Шериф” бош мураббийи Юрий Вернидуб “Шахтёр”га қарши ўйин олдидан ўз фикрларини билдириб, жамоаси нега гуруҳдан чиқа олмаганини айтди.
_9.jpg?1638852302112)
- Афсуски, биз ҳам, “Шахтёр” ҳам Чемпионлар лигасини давом эттира олмаймиз. Лекин биз Европа лигасининг 1/16/ босқичида қатнашишимиздан хурсандмиз. Ҳар бир ўйиндан олдин шогирдларимга бир сўзни такрорлайман: Майдонга чиқиб, футбол ўйнанг ва роҳатланинг.
Аслида гуруҳ баҳсларини яхши бошладик ва иккита учрашувда ютдик. Лекин ҳиссиётларимиз жунбушга келганига қарамай, бизни нималар кутаётганини билардик. Етакчи ўйинчиларимизнинг жароҳатлари панд берди, уларнинг ўрнини босадиганларини топа олмадик. Булар келажак учун дарс бўлди.
Украинага жароҳатини даволатаётган Жасур Яхшибоевни олиб келмадик, - деди Юрий Вернидуб.
Жасур Яхшибоев айнан Чемпионлар лигаси гуруҳ босқичи олдидан “Шериф”нинг ҳужумкорлигини ошириш учун Польша чемпиони “Легия”дан мавсум охиригача ижарага олинган эди. Юрий Вернидуб легионеримизни Беларусь чемпионатидаги ўйинлари орқали яхши билади.
Тажрибали мураббийнинг бу иши ўзини оқлади. Жасур нуфузли мусобақанинг гуруҳ босқичида “Сантьяго Бернабеу” стадионида гол уриб, “Реал” устидан қозонилган тарихий ғалабага пойдевор қўйди. Бироқ ўша ўйинда ҳамюртимиз шикастланди ва шундан бери жароҳатидан тўлиқ қутила олмаяпти.
Жасур Яхшибоев Чемпионлар лигасининг гуруҳ босқичида учта учрашувда иштирок этди. Шунингдек, футболимиз Молдова чемпионатида олтита беллашувда қатнашиб, битта гол ва учта голли пас муаллифи бўлди. Молдова кубогида бир марта майдонга тушди.
Энди “Шериф” Европа лигасида ўйнайди. УЕФА қоидасига кўра, Чемпионлар лигаси гуруҳ баҳсларида учинчи ўринни эгаллаган жамоалар Европа лигаси гуруҳларида иккинчи ўрин соҳиби бўлган клублар билан нимчорак финалга чиқиш учун уй-сафар тизимида ўзаро куч синашади.
“Шериф” ўз гуруҳида муддатидан олдин учинчи ўринни нақд қилди ва Европа лигасига йўлланма билан бирга 500 минг еврога ҳам эга бўлди. Шу тариқа, Тирасполь клубининг жорий мавсумда Европа Чемпионлар лигасидан топган даромади 22,87 миллион еврони ташкил қилди.
Энди “Шериф” гуруҳдаги сўнгги учрашувни сафарда “Шахтёр”га қарши ўтказади. Ушбу баҳс ғолиби яна 2,8 миллион еврони қўлга киритади. Дуранг қайд этилса, жамоалар 930 минг евродан қўшимча пул олади.
Жасур Яхшибоев жамоаси Европа лигаси плей-оффидаги рақибини 13 декабрга белгиланган қуръа маросимида билиб олади.
Яна бир маълумот шундан иборатки, Яхшибоев январда жамоасини ўзгартириши ҳам мумкин. Яқинда футболчимиз “Футбол” телеканалидаги “Offside” кўрсатуви меҳмони бўлиб, келгуси режалари борасида фикр билдирди.
- Менда ҳозир 2-3 та вариантлар бор. Ҳозир очиқчасига қайси клублар эканлигини айта олмайман. Барчаси аниқ бўлса кейин гапириш мумкин.
Қайси давлат? Португалиядан! Ушбу мамлакат чемпионатида кучли учликда юрадиган клуб. Яъни, “Порту”, “Бенфика”, “Спортинг” кабилардан бири.
Бундан ташқари бошқа жамоалардан ҳам таклифлар бор. Лекин ҳаммаси кишки трансферлар даврида ойдинлашади. Шу пайт бошқа жамоага ўтишим мумкин. “Легия” барибир мени яхши таклиф бўлса сотади.
Трансфермарктдаги нархим 750 минг евро. Бироқ сотадиган ва оладиган томон ўзаро келишиб, нарх белгилайди. Бу узоғи 2 миллион еврогача бўлиши мумкин, - деди Яхшибоев.